Zarkawt Derby-ah BCA an chungnung

Ningani zan khan Samsung 3:16 Plan Solution Mizoram Super League-ah inkhel hmuh­nawm kan hmu a, Zarkawt derby-ah Zarkawt BCA chungnung zawkin Zarkawt Serpents chu 65-57 in an hneh.

Hawla Indoor stadium-a inkhelah hian BCA tan Dennis Vanlalnghaka hmuhnawm khawpin a khel a, a team tan point 16 score in rebounds 22 zet a la thei a ni. Serpents tan Lalrinnunga Khiangte a che ṭha a, a ni hian point 12 a team tan rawn hlawhchhuakin rebounds pali a la thei a ni.

Zarkawt Serpents tan MSL-ah thil ropui beisei tur a awm tawh lo a, an game hmabak pahnihah chak ve ve mahse final an lut zo tawh lo a ni.

Zarkawt BCA erawh an chak leh tak avangin an dinhmun a duhawm sawt hle a, MSL-ah Mission Veng Vikings leh Tuikual South an la khel leh dawn a, an game pahniha pakhat zawkah chauh an chak a nih pawn final an lut tawh dawn a ni.