Austin MotoGP atan Marquez a inpeih

Naktuk Pathianni khian bike intlansiak ngai­na tute tan intlansiak hmuh­nawm a awm leh dawn a, kumina intlansiak vawihnih nan Austin Moto Grand Prix chu tlan a ni leh dawn ta.

He intlansiak lo awm tur atan hian Repsol Honda rider Marc Mar­quez chuan a inpeih tawh thu a sawi. Qatar intlansiakah khan panga na a ni pha chauha, a champion nomawi hum­him a duh a nih chuan tum ṭumah hian a chet ṭhat leh zual a ṭul ang.

Nikum khan helai hmunah hian Marquez hi pakhatna a lo ni tawh a, kuminah pawh hian rider hmuhnawm leh tawrhhlehawm ber pawl a ni leh ngeiin a rinawm.

Kumina intlansiak hmasa ber chu March 29 khan Qatar-ah neih a ni a, hetah hian kum 36-a upa Yamaha rider Valentino Rossi chu tuma umphak lohin pakhatna a ni. US ah pawh hian mipui ngaihven leh hmuhchar ber te zinga mi a ni leh dawn.

Rider ten eng nge an sawi?

World champion nilai kum 22-a upa Marquez chuan, "He lai hmun a intlansiak hi nuam ka ti em em a, intlansiakna kawng mai bakah a chheh vel boruak pawh hi nuam ka ti a ni. Ka ngaihdan chuan US ah hian bike intlansiak hi a ṭhang chho mek a tunhnai kum hnih chhung hian hmasawn na hmuh tur a tam hle, kuminah pawh hian ṭha tak a kan tlan leh theih ka beisei," tiin a sawi.

World champion vawi sarih zet lo ni tawh Rossi chuan, "Tunah hian ka hriselna leh ka rilru put hmang a dika, hun rei zawk chu ka ka intlansiak theih ka ring. Intlansiak hi nuam ka tiin ka tum ber pawh a ni a, training ṭha taka ka nei chhunzawm zel thei a nih chuan kum 40 ka nih thlengin intlansiak ka hmachhawn thei ang. Pathianni a intlansiak kan hmachhawn leh turah pawh hian a ṭha ber nih kan tum leh dawn a ni," tiin a sawi.