Chinese Grand Prix an tlan dawn

Kum 2004 aṭanga tlan ṭan tawh Chinese Grand Prix chu tun Pathianni chhun dar 11:30 hian tlan a ni leh dawn ta. Tun ṭum hi Chinese Grand Prix vawi 12 an tlanna tur chiah a ni.

Shanghai International Circuit hi architects Hermann Tilke leh Peter Wahl ten tunlai taka an siam a ni a, intlansiak kawng hi Km 5.4 a sei niin Chinese character 'shang' pianhmanga duan a ni. 'Shang' awmzia chu sang/chungah tihna a ni. Km 5.4 a sei tlankawngah hian vawi 56 zet an tlankual dawn a, a vaia an tlan tur zawng thui zawng chu Km 302.4 a ni ang.

Chinese grand prix-ah hian team construction-ah chuan Ferrari an la che ṭha ber a, vawi li pakhatna an ni tawh. Driver malah chuan Lewis Hamilton chak hnem ber tawhin ṭum thum a tlan chak ber tawh bawk a ni.

Nikum khan helai hmunah hian Mercedes driver Hamilton chu pakhatna a ni a, a team-mate Nico Rosberg chu pahnihna a ni. Inhliam vanga tun season intlansiak hmasa ber tlan thei lo McLaren driver Fernando Alonso chu pathumna a lo ni tawh bawk. Anni pathum bakah hian kumin Malaysian grand prix a pakhatna Ferrari driver Sebastian Vettel te hi mipui hmuhchak ber an ni ang.

World champion nilai Hamilton chuan intlansiak tur thlirin, "Chinese Grand Prix hi chu hmun dangaiin a danglam bik riau a, chak tur chuan ngaihtuahna fim tak hman a ngai leh zual ṭhin. He lai hmuna intlansiak hi a hautak em em a, motor ke thlan thiam a ngai ṭhin hle a ni. Min ṭantu mipui tam tak an awm theih ngei ka beisei a, anni vangin hnehna ka chan theih leh ngei pawh ka ring," tiin a sawi.

Malaysian Grand Prix a pakhatna Ferrari driver Sebastian Vettel chuan, "Nikuma kan car leh kumina kan car hi khaikhin chi pawh a ni lo, nikum kha chuan a ṭha tawk em em tho a, mahse kuminah chuan kan car hi a ṭha leh zual a ni. China a intlansiak hi a danglam bek em em a, intlansiak hi mipuiin an hlut em em a, heihi a nawm na chhan ber pakhat chu a ni," tiin a sawi.