Australia cricketer ropui Benaud a thi

Australia cricket captain hlui leh cricket commentator ropui Richie Benaud chu Zirtawpni khan kum 84 mi niin a thi. A thih chhan hi vun cancer vang a ni a, nikum November khan cancer natna a vei tih hmuchhuah a ni. Benaud hian a nupui kum 48-a upa Daphne leh a fate pahnih a thihsan a ni.

Spin bowler Benaud hian kum 1964 khan cricket khelh chawlhsanin Test match 63 a khel hman a, vawi 28 chu captain nichunga khel a ni nghe nghe. First class cricket match 259 khelin wicket 945 a la a, run 11,719 zet a vawchhuak bawk. Benaud hian record chhuanawm tak tak a nei nual a, chung zinga langsar ber pawl chu Test cricket level-a run 2,000 leh wicket 200 la thei hmasa ber a ni.

Kum 1985-a Sport Australia Hall of Fame-a lakluh Benaud hian Test series-ah Australia hi vawi sarih captain anga kaihruaiin vawi khatmah tlawm hmel a hmuhpui lo a, vawi nga an khingpuite hnehin vawi hnih an draw a ni.

Cricket khelh a chawlhsan hnuin field pawn lamah erawh cricket a chawlhsan mai lo a, media lamah kalin lehkhabu ropui tak tak a ziah bakah chanchinbu lar tak takah columnist a ni a, cricket commen­tator angin a hming a chher hle bawk.

Kum 1956 Ashes tour England-a an neih zawh hlim khan player ni reng chungin BBC hnuaiah journalism a training chhuak a, BBC-ah hian kum 40 chhung chu a thawkzui nghe nghe a ni.

Commentator a nih angin kum 1960 khan BBC radio kaltlangin commentary a pe hmasa ber a, kum 1963 khan TV-ah commentator a ni ṭan leh a ni.

Benaud hi nuihzatthlak leh hlimawm tak taka cricket match a comment ṭhin avangin a commentary te'n lawm an hlawh thei hle a, kum 1977 aṭang khan Aus­tralia Television Channel Nine-ah cricket match commentator hna a thawk bawk.

Richie Benaud cricket zinkawng:
January 1952 : Sydney Cricket Ground-ah a test match hmasa ber khelin West Indies a hmachhawn.
December 1958 : Australia captain nichunga a test match hmasa ber a khel a, Brisbane-ah England nen an inkhel a ni.
1960 : BBC tan radio commentary hmasa ber a pe
December 1963 : A test match 60 na khelin 2,000 Test run & 200 wicket la hmasa ber a ni
1963 : A television commentary hmasa ber BBC-ah a ṭan
February 1964 : A test match hnuhnung berah South Africa chu Sydney Cricket Ground-ah a hmachhawn.