Albert kha thah a ni - Andre
Nikum August thla a inkhelh laia boral ta Cameroon striker Albert Ebosse pa Andre Bodjongo chuan a fapa chu tum lawk leh ruahman lawk anga thah a ni thu a sawi.
Ebosse hi Algerian top division club JS Kabylie tana khel niin USM Alger nen an inkhelh laiin fans aṭangin a lu ah an vawm a, hei hi tuar lo in a boral ta a ni.
Andre chuan, "Ka fapa kha lungin an vawm satliah mai a ni lo a, thah tum hrim hrim in fans aṭang khan an vawm a ni. Ka fapa thih hnuin a club khelhna JS Kabylie aṭangin tuman an rawn call lo hrim hrim a, an club President takngial pawhin min be lo a, a teammate-te pawn tawrhpuina thu min thawn lo. Ka fapa kha tum lawk renga thah a ni a, a thihna chhuichianna kawnga inrawlh turin Africa football thuneitu sang CAF leh FIFA-te ka phut tlat a ni," tiin a fapa thihna chu chhui chian ngei a phut.
Ebosse kha 2013-14 season khan Algeria top division league-ah top scorer niin Cameroon tana khel tura hming chhawpchhuah langsar zingah telin Europe club lian tak takin an enthlak lai a ni a, a thih khan kum 25 chauh a ni.