Montenegro buaina Russia tan lawmna

March 27-a Russia leh Mon­tenegro inkhela buiana chhuah avang khan Russia chu Europe a football thuneitu sang ber UEFA chuan chak zawkah a puang.

UEFA hian Russia hi 3-0 a chak zawka a puan mai bakah buaina chawkchhuaktu lam Montenegro chu Euro 50,000 (Rs 3,304,216) chawi turin a ti bawk a, an khel­muala inkhel an hmachhawn leh hmasak berah khelmual ruakah an inkhelh a ngai dawn bawk a ni.

Euro qualifying Group G match Russia leh Montenegro te'n Pod­gorica-a an khelh ṭumin mual neitu Montenegro fan te'n buaina an chawk chhuak a, hal mawi field chhunga an vawmluh avangin inkhel chawlhsan lailawk a ni. Inkhel hi chhunzawm ni mah se second half-ah buaina a chhuah chhunzawm leh avangin inkhel tihtawp a ni a, Russia keeper Igor Akinfeev chu a nghawngah hliam a tawrh vangin hospital-ah hruai a ni nghe nghe.

Hetihlai hian Croatia pawh Euro 2016 qualifier June thlaa Italy nen an khelh hunah stadium ruaka inkhel tura tih an ni bawk a, euro 50,000 chawi tir an ni bawk. Croatia hrem chhan hi Norway 5-1 a an hneh ṭumin fan te'n vun rawng vanga inhmuhsitna thil an lan tir vang a ni.