2015 NECS Cup Champion Armed Veng

Armed Veng-in NECS Cup nomawi chawi chungin kan hma lawka Central YMA foot­ball inelna awm tur an hmachhawn dawn.

Armed Veng hian nimina final hmuhnawm tak Lammuala khelhah NECS Cup-a hneh loh la tawng lo, Ramhlun South chu hun pangngaia 2-2 an draw hnuin penalty shootout-ah 6-5 in an hneh. Armed Veng a vawi khatna atan inter-village football-ah an champion ta a ni.

Armed Veng phawt

Vawi thum champion tawh Ramhlun South goal bawh a na nghal a, Dinthar FC midfielder Samson Ramengmawia'n hnai tak aṭangin a khung lo.

Ramhlun South an hlauawm chhunzawm a, MPL3-a Chanmari FC tana goal li khungtu Thlamuana chu penalty area-ah tihtluk a ni a, penalty pek a ni lo.

Armed Veng an insiamrem a, Ramhlun South tlar hnung a phui lo hle. Armed Veng tan Mizoram Police FC forward Lalfakzuala a hlauhawm a, penalty beiseia a tlu chuan referee a hmin lo.

Armed Veng de­fender-te'n a ṭum hnih nan Thlamuana an titlu a, referee-in penalty pe mah se Thlamuana u Lalnunmawia'n goal-ah a chantir thei lo.

Ramhlun South-in an penalty hlah an tuar zui a, Fakzuala'n Vanlalduatsanga balla pek chu minute 39-naah Aizawl FC rawlthar Duata hian a pet lut a, half time-ah 1-0 a ni.

An inhnehtawk

Second half an ṭan a, Ramhlun South an vannei takzet. Minute 54-naah vei lam aṭanga Thlamuana ball vawrh luh chu tibuaitu nei lo Armed Veng defender Zothanzuala'n tauh sualin an lamah a tauh lut. Lammuala kawr sen ha thawm a ring hle.

Team pahnih an fimkhur a, clear chance hmuh tur a awm meuh lo. Minute 70 pelh hret­ah Ramhlun South tan Lalawmpuia'n kawh zetin goal-ah a pet a, Armed Veng keeper Andrew Lalhmingliana'n a dang ṭha hle. Ramhlun South-in minute 77-naah Thlamuana'n a pet goal a, Armed Veng tlar hnung an muthlu.

Ramhlun South an champion leh mai dawna a lan laiin minute 88-naah Hlutea'n penalty area aṭangin keeper Albert Zomuanpuia a pet khum. Goal khungtu Chanmari West FC-a khel Hlutea hi Central YMA football hnuhnung bera Armed Veng champion-na goal khungtu kha a ni. Extra time khelh a ṭul phah.

Extra time chu

Team pahnih an chau tawh a, goal nawr a na tawh lo. Thil thleng langsar ber chu minute 100-naa Armed Veng midfielder Lalremruata leh Ramhlun S midfielder Samson-a te intauh a ni a, player pahnih hi thlak nghal an ni.

Minute 120 zawhah team pahnih an inhneh­tawk. Penalty shootout-ah team pahnih bul ṭan­tuin an pet luh loh hnuah Armed Veng penalty vawi pasarihna pettu rawlthar Allan Lalhriatpuia'n chakna goal a khung ta a ni.

Eng nge an sawi?

Armed Veng coach Lalramchhuana Ralte chuan, "Penalty kan thleng a, a vannei zawk zawk chak a ni tawh a, kan vannei ta a ni. Tuna kan hlawhtlinna hi Pathian vang liau liau a ni a, kan lawm takzet. Veng mipui lungrualna vangin kan champion a, kan champion-na hi Armed Veng mipui ta a ni," tiin a sawi.

Ramhlun South coach HC Zarzoliana chuan, "Kan vanduai ṭum a ni. Samson-a inhliam kha kan tuar a, a tawpah kan chak zo ta lo. Armed Veng ka lawmpui a, champion an phuin ka hria," tiin a sawi.

Penalty chu
Ramhlun South Armed Veng
Ronald Goal lo MP-a Goal lo
Mapuia Goal Zorema Goal
Eric Goal Ruata Goal
Thlamuana Goal OP-tea Goal
Mawitea Goal Hlutea Goal
Hmingmawia Goal B. Sena Goal
Awm Awma Goal lo Hriatpuia Goal

Inkhel Result
Ramhlun South 2-2 Armed Veng
RS : Zothanzuala 54' (OG); Lalthlamuana 77'
AV : Vanlalduatsanga 39'; Lalbiakhlua 88'
Penaltyshootout-ah Armed Veng 6-5 in an chak.