I League Second Division Aizawl FC chak chiang, Chanmari an chak zo lo

Nimin khan Siliguri-ah I League Second Division Round 5 khelh chhunzawm a ni a, Aizawl FC-in PIFA 6-1 zeta sawpin chak vek awm chhun an ni chhunzawm zel.

Chanmari FC erawh Mohammedan SC nen 1-1 in an inhnehtawk. Chanmari hian minute 50-naa red card an hmuh bakah penalty an chawi a, an vanduai a ni.

Aizawl FC hian point 15 hmuin an hmahruaina an sawh nghet zel a, Lonestar Kashmir-in point 12 hmuin an dawt. Point 10 hmu Chanmari FC pathumnaah an awm a, palina Mohammedan-in point 7 an hmu tawh bawk. I League Second Division hi heng club palite inelnaa ngaih a ni.

Aizawl FC tan goal ruk

SSB Ranidanga Ground-a inkhelah minute 11-naah Aizawl FC-in goal khungna chance an neih hmasak berah H. Lalbiakthanga ball vawrh luh chu Alfred-a'n um lutin goal-ah a chantir nghal.

PIFA-in goal venhim an ngai pawimawh a, tlar hnunga an inrem phui avangin Aizawl FC-in penalty area-ah chance ṭha an insiam thei lo a, chuti chgung chuan minute 36-naah BT-a'n box pawn aṭangin cool zetin a khung.

Minute hnih hnuah Alfred-a ball pet keeper dan per chu Rohminga'n a tauh goal a, first half tawp hma hretin ding lam aṭanga Alfred-a cross chu Thara'n dang ding loin kawh zetin a pet lut nghal.

Second half-ah PIFA player hnawhchhuah ni mah se player 10-a khel PIFA-in minute 62-naa Jaydeep Panarkar hmangin goal an khung a, 4-1 a ni. He mi hnu hian Rohminga corner pet chu Thomas-a'n a tauh lut. Hun tawp hma hretin substitute Justice Morgan-a'n Aizawl FC goal rukna a khung.

Coach a lawm

Aizawl FC coach K. Malsawmkima chuan, "Khelh apiangin kan chak a, a lawm­awm khawp mai. PIFA lakah harsatna kan nei lo a, inkhel en pawh a hahdam khawp mai. Amaherawhchu goal kan chhuah reng hi chu a mak a ni," tiin a sawi.

Nimin zing inkhel dangah United SC-in Jagannath Sana leh Rajon Barman te goal hmangin Hindustan 2-0 in an hneh. Aizawl FC-in Thawhṭanni khian Kolkata club United SC hi an hmachhawn dawn a, PIFA nena yellow card chawitu MPL3 best player Lalramchullova a inlan thei lo ang.

Chanmari FC chak zo lo

Kanchenjunga Stadium-ah Chanmari FC-in bul an ṭan ṭha a, minute thumna lekah Lalbiakhlua'n goal hmahruai a khung nghal. Keifang tlangval hian inelna neih mekah goal sarih khungin a aia khung tam an awm lo.

Chanmari-in goal hnihna an khung mai theih loh an tuar, second half ṭan aṭanga minute ngana lekah defender Lalrinchhana'n yellow card ṭum hnihna a hmu a, hnawhchhuah a ni.

Player 10-a khel Chanmari-in goal venhim tumin forward Malsawmfela aiah midfieder Rochhingpuia an luhtir a, amaherawhchu penalty an chawi zui avangin Mohammedan forward Somide Adelaja-a'n minute 68-naah penalty aṭangin an si phurh a sut. Player 10-a khel Chanmari an ṭang tlang a, 1-1 in inkhel a tawp.

Chanmari hian Thawhṭanniah Aizawl FC goal ruk khungna PIFA an hmachhawn ang.