North London Derby : Tottenham khelmualah an hmelma Arsenal

Arsenal hian duh thlang thei ni se la chuan Tottenham Hotspur Stadium an tlawh hun tur hi thlak an duh mai thei, an player pawimawh an hrem bakah an hliam. Mahse, Pathianni zan dar 6:30-a an inkhelh tur hi sawn ngawt theih a ni lo.

Premier League inkhel ngaihven hlawh zinga mi North London Derby a lo thleng leh dawn ta, champion tum ngam Arsenal hian Tottenham lakah fiahna an hmachhawn dawn, contract ziak thar Mikel Arteta a fimkhur khawp ang.

Fimkhur ngai

Arsenal hian hrem vangin midfielder pawimawh Declan Rice an chhawr thei dawn lo, buaina belhchhah turin Martin Odegaard chu Norway tana a fehchhuahna lamah a kerek a hliam, a rei lo berah chawlhkar thum vel tal a chawlh a ngai dawn.

Gunners midfield hi a pan deuh dawn tih chu thil chiang a ni. Thomas Partey an la nei a, tawnhriat nei ṭha Jorginho an la neih bawk avangin lungngai lutuk tur erawh an ni lo - Kai Havertz chu pawh hnun hret theih a ni bawk ang.

Gabriel Jesus chu inlan leh thei tawh tura beisei a ni thung a, Brazilian striker tan inkhel boruak sanga bul ṭan nghal chu a hautak ve mai thei bawk - chutihrualin tawnhriat a neih tam tawh avangin mamawh chuan chhawr theih tur a ni.

Hliam leh hrem te hi football ken tel a ni a, champion loh chhuanlam atan hman theih ni mah se awmzia erawh a nei chuang lo. Chuvangin, Arsenal hian Spurs lakah hian champion turin an ṭha tawk reng em, tih chu an fiah dawn.

North London Derby zawhah hian Atalanta nen Champions League an khel dawn, chumi hnuah Manchester City an tlawh ang. September hi thla pawimawh a ni, an chetsual vaih chuan hma takah hian nomawi beiseina a hla nghal duai thei ang.

Son leh a ṭhiante

Harry Kane a chhuak a, goalkeeper tawnhriat nei ṭha Hugo Lloris a chhuak tawh bawk - khelmual chhunga hruaitu nihna chu Son Heung-min kutah a tla, an hmelma club lakah Son hian mawhphurhna hlenchhuah ngei a tum dawn.

South Korea international forward Son hian tun season ṭan dawn khan, a duhthusam chu Tottenham tana nomawi chawi a nih thu a sawi, season bul an ṭan dan erawh beisei anga ṭha a ni rih lo, tun hi insiamṭhat nana duhthusam a ni ang.

Manager huaisen ve tak mai Ange Postecoglou-a'n Arsenal laka point hmuh a duh a nih chuan midfield a rem fuh a ngai dawn. Rice leh Odegaard te awm lo mah se, season hmasa an intawn ṭuma ball hlauhsawm siam ṭhintu Jorginho chu ven ngai a ni ang.

Leandro Trossard a la awm tel a, ani hi Son leh a ṭhiante tana hnawksak thei tur a ni a, player thar Raheem Sterling veng tura inbuatsaih pawh a sual lo ang. Mual sira awm thiam Bukayo Saka chu sawi lan kher ngai loa ngaihtuah tham a ni bawk.

Spurs hi Arsenal an mikhual hnuhnung pahnihah an tlawm ve ve a, tun hnaiah Arteta leh a naute an ngam lo hle. An record duhawm lo tak thai bo a, season bul an ṭan fuh lohna siamṭhat an duh bawk a nih chuan, tun hi an tan hun ṭha bik a ni thei ang.