MPL11 semifinal khel tur zawnna: Ramhlun, SYS leh Sihphir Venghlun tan ni pawimawh

LZ Juice MPL11-ah vawiin chhun dar 12:00 hian Ramhlun Athletic leh SYS FC te an inkhel dawn a, tlai dar 3:00-ah Sihphir Venglun leh Chanmari FC te an inkhel ang. MPL team thar SYS, Ramhlun leh Sihphir Venghlun ten semifinal khelh beiseina an nei vek a, vawiin inkhel hi a pawimawh hle.

Tlarhnung pawp

Ramhlun Athletic hi coach Danny Lalduhawma enkawl an ni a, goal khung harsat lo mah se goal venhim an harsat thung. MPL match kua an khelh tawh aṭangin goal 24 an chhuah a, an tlarhnung a phui tawk loh avangin point hmuh theihna turah point an hloh hnem tawh hle.

An match hnuhnung berah pawh Ramhlun hian an elpui Sihphir Venghlun an hmachahwn a, Benjamin Lalnunpuia hmangin goal hnih khung hmasa mah se minute 80-na hnu lamah goal hnih an chhuah leh avangin point khat chauh an hmu.

Vawiina Ramhlun khingpui tur SYS hian an match hnuhnung berah FC Bethlehem 1-0 in an hneh thung a, Lunglei club hian point 11 hmuin palinaah an awm mek a, Ramhlun aiin point khatin an hmu tam zawk. Chutihrualin Ramhlunin goal 18 an khung tawh lain SYS hian goal 11 chauh an la khung a, Danny-a hote hi an goal bawh a na zawk.

July 26, Zirtawpni khan team pahnih hi an inhmachhawn tawh a, hemi ṭum hian Ramhlun 2-1 in an chak a, goal khungtu Benjamin-a'n MPL vawi khatnaah season ṭha tak a hmang. Goal khungtu dang captain Flavius Lalruatkima pawh khum hliam vangin rei tak chawl mah se ṭha takin a rawn kir, a tih theih bawk.

Ramhlun hian vawiina SYS an hneh theih chuan Lunglei club chungah an awm dawn a, a sang pali zinga awm turin an dinhmun a ṭha ang. Chutihrualin Lalmuankima hote hian an elpui Ramhlun hneh pawimawhzia an hrechiang dawn a, attacking game khel chungin goal venhim an ngai pawimawh tel ang.

Hmabak harsa chu

Sihphir Venghlunin khelh fuh loh ṭum an nei a, Ramhlun ang thoin goal 24 an chhuah tawh a, goal 12 chiah an la khung. Mahse, Sihphir Venghlun hian Ramhlun hi an hneh miau avangin an elpui team aiin head to head-ah an ṭha zawk a, hei season tawpah a pawimawh thei ang.

Mahse, head to head aia pawimawh hmasa chu point a ni a, Sihphir Venghlun tan Chanmari laka hnehna chan emaw point khat emaw hlawhchhuah hi a pawimawh dawn. MPL11-a an intawn hmasa ṭum khan Chanmari FC-in 3-0 in an hneh a, Sihphir Venghlunin a chhanletna an nei lo.

Lalsangzuala Hmar hote hian I League 3 final round lut turin an khingpui Coramandal FC (3-1), RKM Football Academy (6-0), GMSC (1-0) leh HAL Sports Club (2-1) te hneh vekin final round an lut. Chanmari hian inrintawkna an nei a, season tawpah league champion an duh avangin si ruk lain an thawk chhuak dawn. Sihphir Venghlun tan point hlawhchhuah hrim hrim a harsa ang.