Mikel Arteta a nghet

Arsenal manager Mikel Arteta chuan kum thum daih contract a ziak thar a, tun season tawp ruala a contract tawp tawh mai tur chu kum 2027 nipui thleng atan a pawtsei nghal tihna a ni.

Spanish manager hian Unai Emery thlakin kum 2019 December thla aṭang khan Arsenal hi a enkawl ṭan a, a tirah FA Cup chawipui nghal mai mah se nomawi dang erawh a la hlawh chhuak leh rih lo.

Kum 42 mi Arteta chuan, "He hmunah hian mi ṭha tak tak nen kan thawk ho a, min hualtute hi ka tana mi ṭha ber berte an ni hlawm, anni ho nena chona hmachhawn hi nuam ka ti hle," tiin a sawi.

Arteta kaihhruaina hnuaiah Arsenal hian hma an sawn hret hret, hmathlir thui tak an nei bawk. Tun hnai season hnih chhung chu Premier League champion Manchester City elpui ber an ni a, kuminah pawh an inel lehin a rinawm.

Arsenal co-chairman Josh Kroenke chuan, "Mikel hi manager ṭha bik a ni a, theihtawp chhuaha hnathawk mi a ni. Arsenal nihna leh hlutna a hrechiang a, he hmun a rawn pan hnuah hma lam panin min kalpui," a ti.

Contract thar a ziah mai loh avangin European club lian ṭhenkhat hming a ri hman a, mahse tunah chuan North London lamah hna a thawk chhunzawm dawn. Gunners sporting director Edu nen team an rem nghet chho mek a ni.