Manchester City thubuai - ngaihtuah ṭan a ni dawn ta
Premier League champion Manchester City-in thubuai 115 zet an neih chu Thawhṭanni hian ngaihtuah ṭan a ni dawn ta a, khawvelin Pep Guardiola enkawl club chunga thil thleng tur hi hriat an châk tawh hle.
City thubuai hi member pathum awmna, independent disciplinary commission chuan an ngaihtuah dawn a, an thutlukna chu thutawpna tur a ni dawn - kar 10 zet chu thubuai hi ngaihtuah tura ruahman a ni a, kum 2025 kumtir lamah City dinhmun tur a hriat ang.
'Trial of the Century' tih hialin City thubuai hi sawi a ni a, season li zet a zawna Premier League champion ni tawh hi an nomawi chawi tawh zawng zawng hlihsak an ni mai thei a, Championship lama tlaktir theih hial an ni dawn!
Thubuai chu
City thubuai 115 hi dik lo taka sum hman leh, Premier League dan kal pel a, sum hmanna vel a ni ber a, tam tak chuan Premier League hi club hausa City chunga che ngam loah an puh hial tawh.
Premier League chief executive Richard Masters chuan, "Hun rei tak chhung he thubuai hi a kal tawh a, he thubuai hi kan chinfel a hun tawh a ni," tiin a lo sawi ve tawh.
City puhna langsar tak pakhatah chuan, City thuneitute hian player lei nan leh club inrelbawl nan, Premier League dan kalhin mimal sum an hmang a, hemi thup nan hian sponsor aṭanga hmu angin an tarlang a ni.
Dinhmun ṭha lo
June thla khan Portuguese computer hacker lar Rui Pinto chuan City thubuai chungchangah, English club thil tih dik lo finfiahna a neih nual thu a sawi a, ani hi Football Leaks website khaipa ber niin, football khawvela thuruk tam tak a lo hailang tawh.
Kum 2018 khan German chanchinbu lar tak Der Spiegel chuan City hian UEFA dan an bawhchhiat loh nan, an sum chet vel dan an zep ruk thu an lo tarlang tawh a, City hian Der Spiegel chu an club tihhmingchhiat tumah an puh thung.
UEFA chuan kum 2020 khan City hi a lo hrem tawh a, European football inelnaa kum hnih inlan thei lo turin an ti. Mahse, Court of Arbitration for Sport (CAS) ah an zualko a, thiam an chang leh lawi si a ni.
Hmabak
City hi 2009-10 leh 2017-18 season inkara an sum dinhmun chiang taka an tarlan theih loh avangin thubuai 54 siamsak an ni a, 2009-10 leh 2017-18 season inkara player leh manager te hlawh chiang taka tarlan tur an neih loh avangin thubuai 14 siamsak an ni bawk.
UEFA hnuaia Financial Fair Play (FFP) dan anga 2013-14 & 2017-18 inkara an chet loh avangin thubuai panga an nei a, Premier League PSR dan chu 2015-16 & 2017-18 inkara an bawhchhiat avangin thubuai pasarih siamsak an ni a, December 2018 - Feb 2023 inkar chhui an nih a, Premier League an thawhpui ṭhat duh loh avangin thubuai 35 siamsak an ni.
Khelmual pawnah thubuai ngah mah se, a chhung lamah erawh City an talbuai lo zel - Manchester khaw club hian league match thum an khelh tawhah hnehna an chang vek a, zanin dar 7:30 hian Brentford an mikhual ang.