Ten Hag-a'n na takin Ronaldo a chhanglet!

Cristiano Ronaldo chuan tun hma lama an ropuina ang nei let turin Manchester United chuan siamṭhat ngai an ngah hle tih a sawi a, coach Erik ten Hag pawh na taka sawiselin a rilru put hmang a dik tawk lo niah a ngai bawk.

Dutch manager Ten Hag kaihhruaina hnuaiah Man United hian Premier League season hmasa kha an hmang ṭha tawk lo, pariatna dinhmun an luah phak chauh - English football inelna sang bera an chetchhiat ber ṭum a ni hial.

Tun season pawh beisei angin bul an ṭan lo, an match vawi thum khelh tawhah vawi hnih an tlawm der tawh! Fulham hnehin bul ṭan mah se, a hnuah Brighton & Hove Albion leh an hmelma kumhlun Liverpool te an ngam lo.

Rio Ferdinand nena an inkawmnaah Ronaldo chuan, "Coach khan Premier League leh Champions League champion tura an ṭhat tawk loh thu a sawi a, hei hi Manchester United coach ṭawngkam hman dan tur a ni thei lo ang.

"Kan theihna leh squad enin kan thei rih lo a, kan tlin rih lo pawh a ni mai thei. Mahse, kei chuan champion turin kan ṭha tawk lo tih hi ka sawi ve thei lo, a chhan chu theihtawp chhuahin kan bei tur zawk a ni.

"Manchester United hi ka hmangaih a, tun hma lama kan hun lo hman ṭhin tawh dante kha ka theihnghilh mai thei lo. Chuvangin ropui leh ṭha taka inlan chhuak leh thuai turin ka duhsak," tiin a sawi.

Portugal captain Ronaldo hian Man United tana a hun hmasa lamah season ruk chhung a khel, hetih chhung hian Premier League nomawi pathum, Champions League, League Cup pahnih leh FA Cup a lakpui.

Heng bakah hian FIFA Club World Cup leh Community Shield te a la bawk a, chumi hnuah a hun laia khawvel player man tam ni turin Old Trafford aṭangin Real Madrid lam a pansan.

Spanish club tan hlawhtlinna hrang hrang a chang a, chumi hnuah Italian club ṭha Juventus a zawm. Turin khawpui aṭangin Man United-ah bawk a kir a, mahse a hun hman leh vawi hnihnaah hian beisei angin a hlawhtling zui ta lem lo.

Ronaldo thusawi chungchang hi Ten Hag an zawt a, Dutch manager chuan, "Ronaldo hian a nghaihdan sawi turin zalenna a nei a, hei chu thil nih dan phung a ni. Ram hla tak mai Saudi-ah a awm mek a, a awmna chu Manchester aṭanga hla tak a ni," tiin a sawi.

Ten Hag hian ngaihdan nghet tak a nei tlat a, khawvel huapa player langsar leh huhang ngah Ronaldo pawhin a ngaihdan a thlaksak thei lo. Tun hnuah amah beihna thu sawi mah se, a tan awmzia a awm lem lo tih a sawi tel bawk.

Ronaldo hi Manchester United manager Erik ten Hag nen an thu a inhmu lo fo a, kum 2022 tawp lam khan an boruak a puak keh. Ronaldo hi Piers Morgan lakah a inpuang a, a club chuan an hnuchhawn niin a sawi, a hnuah Saudi Arabian club Al-Nassr a zawm a ni.

Man United hian vawiin tlai dar 5:00 hian Southampton an lenchilh dawn a, hliam vangin an player pawimawh hrang hrang an la inlan thei lo ang. Luke Shaw pawhin a club hlui hi a la hmachhawn thei dawn lo tih a chiang.

Striker Rasmus Hojlund pawh a la dam lo - Uruguay midfielder Manuel Ugarte erawh a inpeih a, a tul a nih chuan Ten Har-a'n a chhawr thei tawh dawn a ni.