Contract vangin kan buai lo - Slot

Liverpool coach Arne Slot chuan tun season tawp ruala contract hmang zo tur Virgil van Dijk, Mohamed Salah leh Trent Alexander-Arnold nei mah se, player langsarten contract an hmang zo mai tur chu an tan buaina a nih loh thu a sawi.

Slot chuan nimin tlai khan media-te zawhna chhangin, "Ka chhanna chu a ngai reng a ni. Media hmaah contract chungchang kan sawi ngai lo - player pathumin contract an hman zawh hnaih avangin kan buai lo a, result ṭha ber neih tumin, team angin kan thawk ho zel a ni," a ti.

Liverpool-in Manchester United an sawp hnu lawkah khan Salah chuan Anfield-a a hun tawp ber a nih theih tawh thu a sawi a, contract thar a phutnaah tam tak chuan an ngai.

Hetihlai hian VVD pawhin contract thar ziah a duh nia sawi a ni a, Arnold hi Liverpool academy chhuak a nih miau avangin cham ngei tura ngaih a ni bawk - engkim a la chiang lo!

Liverpool hian Arne Slot hnuaiah season duhawm tak hmangin, league match thum an khelh tawhah an chak vek a, zanin dar 7:30 hian Nottingham Forest an mikhual dawn - a zawna match li chak an duh ang.

Reds player zingah Harvey Elliott chu hliam vanga inlan thei lo tur chiang a ni a, match hnuhnung bera inlan thei lo Alexis Mac Allister erawh a dam tawh a, lakluh thar Federico Cheisa pawhin club training a zawm tawh bawk.