Chelsea-ah Chilwell a cham dawn

Premier League club indinthar tum mek Chelsea coach Enzo Maresca chuan a ruahmannaah Ben Chilwell a tel loh thu sawi mah se, English defender hi a chhuah leh dawn tak loh avangin Premier League squad-ah a telh dawn niin an sawi.

Chilwell hi nizana transfer bazar khar ve chiah Turkey lamah pem tur anga sawi a ni a, mahse, he thu buatsaih a nih lai hian a transfer tur hi a tlawlh niin khawthlang media-te chuan an tarlang.

English fullback hi Maresca chuan a ruahmannaa a tel loh thu chiang takin hrilh tawh mah se, tun hnaiah player inhliam awm avangin first team zingah training a nei ve leh tawh niin khawthlang media-ten an tarlang a, chhawr loha awm reng atan chuan a uiawm mai thei.

Chelsea hian league match thum khel tawhin, match hmasa berah Manchester City (2-0) an ngam lo nghal a, Wolverhampton Wanderers lakah 6-2 in chak mah se, match thumnaah Crystal Palace chu 1-1 in an draw.

Hetiang boruak karah hian club neitute inhmuhthiam loh thu hriat tur a awm ve leh bawk a, Blues tan khua a var lo hle. Chelsea hian zanin dar 12:30-ah league match khel turin Bournemouth an lenchilh ang.