ISL-ah Mizoram player 37 zawk!

Nizan khan India rama club football inelna sang ber Indian Super League khelh ṭan a ni a, match hmasa berah Mohun Bagan leh Mumbai City inkhelin, an result kan hre hman lo.

September 12, Ningani thleng khan ISL-a Mizoram player awm zat tarlan chu 33 an ni a, September 13, Zirtawpnia Vanglaini chhuakah pawh hetiang zat ang hian tarlan a ni. Mahse, nimin lamah ISL squad hi update leh a ni a, Mizoram player pali an awm belh.

Chuti a nih chuan ISL-ah Mizoram player 37 an inlan dawn tihna a ni a, ISL-a Mizo inlan tam lawr lak a ni dawn. ISL ṭan kum, kum 2014 khan Mizoram player paruk an awm a, 2015-ah 10 awmin, 2016-ah 14, 2017-ah 16, 2018-ah 20, 2019-ah 16, 2020-ah 30, 2021-ah 27, 2022-ah 26, 2023-ah 27 a ni a, tun season hmaa an tam ber kum, kum 2020-a player zat chu player pasarih ngawtin khum a ni ta a ni.

September 12-a lang lo, nimin lama squad-a langte hi Hyderabad-ah defender Laldanmawia, FC Goa-ah midfielder Lalthangliana leh midfielder tho Malsawmtluanga, Mohammedan SC defender Lalrinzuala Khiangte te an ni.

ISL hi vawiinah khelh chhunzawm tur a ni a, tlai dar 5:00 hian FPAI Young Indian Player of the Year Isak Vanlalruatfela khelhna Odisha FC chuan Chennaiyin mikhualin, zan dar 7:30-ah Bengaluru chuan East Bengal an mikhual dawn a, Pathianni zan dar 7:30-ah Kerala Blasters chuan Punjab FC an mikhual bawk ang.