Messi level chu ka thleng thei lo ang - Yamal

Barcelona player ṭhangduang Lamine Yamal chuan a tan Lionel Messi thlen chin thleng turin a harsa tih a sawi a, "Thil theih loh tawp a ni," a ti!

Yamal hi kum 17 mi lek ni mah se, Barcelona tan player pawimawh a ni der tawh a, Euro 2024-ah Spain chu champion nomawi chawipuiin, Catalan club tan La Liga nomawi a chawi tawh bawk.

Hei vang hian Messi nen khaikhin a hlawh fo a, mahse, Spain tan vawi 16 inlana goal thum khung tawh forward hian khawvela footballer ṭha ber ang hiala tam takin an ngaih Messi-a 'level' thlen chu thil theih lohah a ngai.

Keimah zawk le...

Kum 37 mi Messi hian Barcelona aṭanga inzir chhuakin, kum 2021 thleng kha Catalan club tan hian a khel a, champion nomawi chawi theih zawng zawng chawiin, Barca tan match 778-ah goal 672 a khung.

Messi hian khawvela footballer ṭha ber chawimawina Ballon d'Or pawh vawi riat ngawt a dawng tawh a, Yamal-a tan a thlen chin thleng turin kawng thui tak a la awm - kum 17 chauh a la ni tih erawh hriatsak a ṭha.

Yamal chuan, "Football chanchina player ṭha ber nena min khaikhin hi nuam ka ti a, mahse, ka nih anga khelhchhuah hi ka duh ber chu a ni mai - Messi thlen chin thlen chu thil theih loh a ni," a ti.

Tun season Barca

Barcelona hian tun season-ah league match li khel tawhin Yamal hi a la inlan vek a, goal khat khungin, assist vawi li a nei - match khelh hmabak tam tak a la awm a, a la vul dawn chauh niin a lang.

Catalan club hian league match li an khelh tawhah hnehna an la chang vek a, coach Hansi Flick-a kaihhruaina hnuaiah hma an sawn hle - goal 13 zet khung tawhin, an lamah goal thum chiah a la lut a, table chung ber an luah mek.

Barca hian Pathianni zan dar 7:45-ah league match an khelh chhunzawm dawn a, Girona chu khualmualah an lenchilh ang. Barca chet ṭhat laiin champion lai Real Madrid erawhin beisei an phak lo a, match li an khelh tawhah vawi hnih draw neiin, vawi hnih chiah an la chak - zanin dar 12:30 hian Real Sociedad an lenchilh ang.