Kane-a'n ngai a awh leh tawh?

Zanin dar 10:00 hian Bayern Munich-in Holstein Kiel an tlawh dawn a, Bundesliga top scorer ni lai Harry Kane chu en bik tur a ni thei ang. Bayern Munich striker Kane hian international break-ah khan England tan match 100-na a khel a, Finland lakah goal hnih a khung.

Kum 31 mi Kane hian Euro 2024 hmang ṭha tawk lo mah se goal hmaah ngai a awh leh ṭan a, England manager thar Lee Carsley hnuaia a che ṭha hian club lamah pawh inrintawkna a neih phah ang. Season liam ta khan league match 32 aṭangin goal 36 a khung a, tun season-ah league match vawi hnih a khelh tawh aṭangin goal khat a khung tawh.

Bayern manager thar Vincent Kompany-a'n Kane a ringtawk a, hmun pawimawh a chanter avangin tun season-ah pawh top scorer ni leh tura rinkai a ni. Chutihrualin Kane atana pawimawh ber chu nomawi a ni a, mimal record siam ṭhat aiin Bayern champion pui chu chak zawk ngei ang.

Bavarians hian match hnih an khelh tawhah an la chak vek a, season liam taa hneh loh tawng loa champion Bayer Leverkusen erawh an tlawm tawh thung. Xabi Alonso hote hian match hnuhnung berah RB Leipzig 3-2 in an hneh lo a, nomawi humhim turin insiamṭhat an mamawh. Leverkusen hian zanin dar 7:00 hian Hoffenheim an tlawh ang.