Beisei ang chiahin Sancho a ṭha - Maresca

Chelsea-in zamin dar 12:30 hian Bournemouth an tlawh dawn a, Manchester United aṭanga loan hmanga an hawh Jadon Sancho pawh London club tana inlan thei tura beisei a ni. Blues hian match thum an khelh tawhah chak, chak lo leh draw an nei vek tawh a, table-ah 11-naah an awm mek.

Blues manager Enzo Maresca chuan, "Sancho chu ka beisei lawk ang chiahin a ṭha. Player mal hmachhawnah a ṭha em em a, khingpuite goal bul hnaihah a hriam bawk. Team tan a ṭangkai khawp ang," tiin a sawi.

Sancho hian Erik Ten Hag hnuaiah beisei angin che ṭha lo mah se theihna sang tak a nei tih erawh thup rual a ni lo. Season liam ta khan loan hmangin hming a chher tawhna Borussia Dortmund-ah a khel a, January thlaa lut chauh ni mah se match match 21 khelin goal thum a khung a, Champions League final a thlenpui bawk.

Chelsea-a laluttu Maresca hian Manchester City-ah Sancho hi a hre tawh a, a theihna a hriatchian vangin zaninah pawh a chhawr ngei a rinawm hle.