Greenwood chungchangah Marseille president a inchhir lo

Marseille president Pablo Longoria chuan Mason Greenwood an lak hmain thil hriat tur pawimawh zawng zawng an thlir vek a, chuvangin English forward an lakluh vangin inchhirna an neih loh thu a sawi. Kum 22 mi Greenwood hian August thla khan Old Trafford aṭangin French club hi a zawm a, kum 2029 thleng daih contract ziakin a man hi £26.6mtd a ni.

Greenwood hian theihna sang tak nei mah se January 2022 khan a bialnu Harriet Robson chuan English forward lakah hian pawngsual leh kutthlak thubuai a thehlut a, hun rei tak chhung a buai phah. February 2023 khan Greenwood thubuai hi chinfel a ni a, a bialnu Robson nen July 14, 2023 khan fa neiin an inkar chu a fel.

Man United pawhin theihna nei sang bik Greenwood hi chelh dan zawng mah se sawiselna nasa tak karah an chhan ngam lo. Season liam ta khan loan hmangin Getafe-ah khel a, Greenwood hian match 36 aṭangin goal 10 a khung.

Marseille-in Greenwood buaina hre chungin an lalut a, sawiselna pawh an tawk - an khaw mayor Benoît Payan pawhin French club hi Greenwood an lakluh vangin na takin a sawisel. Mahse, Pablo Longoria erawhin Greenwood hi a chhan tlat.

Marseille president Longoria chuan, "Mayor thusawi pawh kan hria a, mahse ani chuan thil a hre kim lo. Keini chuan engkim kan hria a, uluk taka kan ngaihtuah hnuah thutlukna kan siam. Kan thutlukna siam pawh tun thlengin a ṭha, ka ti. Kan coach Roberto de Zerbi nena kan inbiak hmasak berah pawh Mason-a hming kan lam ri nghal. Theihna sang tak a nei a, kan zinga a tel hi kan lawm hle," tiin a sawi.

Zanin dar 8:30-ah Marseille hian an mual Stade Velodrome-ah Nice an mikhual dawn a, Greenwood hian match hmasa pathum aṭangin goal nga a khung tawh a, French club tan bul a ṭan ṭhe.