Mimal aiin club a pawimawh - Inzaghi

Inter Milan coach Simone Inzaghi chuan club a pawimawh ber tih a sawi a, season hmasa lama an hlawhtlin theih chhan pawh mimal aia team an dah pawimawh vang niin a sawi.

Inzaghi kaihhruaina hnuaiah Inter Milan hian season hmasa khan Serie A nomawi a chawi a, tun season league match vawi thum an khelh tawh chinah pawh point sarih hmuin table hmahruaitu an ni mek.

Italian manager Inzaghi chuan, "Football-ah chuan tun hun hi a pawimawh ber a, hun liam taa kan thil tawnte kha kan ring reng thei lo, chutihrualin kan sulhnu erawh theihnghilh theih a ni lo thung.

"San Siro ka pan tirh khan thil a awlsam nghal vek lem lo, hlawhtlinna chang tur kha chuan zawimuanga kan insiamrem ve kha a ngai a, season thumnaah a rah kan seng niah ka ngai," tiin a sawi.

Inzaghi hian kum 2021 khan Antonio Conte thlakin Inter Milan hi a enkawl ṭan a, a tir season hmasa pahnihah chuan ropui takin an khel nghal bik lo, nikumah erawh Italian club zingah anmahni elphak an awm lo.

Tun season chu Inter Milan tan hian awlsam taka nomawi humhim theih a ni dawn lo niin a lang. Juventus chu Thiago Motta kaihhruaina hnuaiah an insiamṭha mek a, nomawi inchuh boruak a sang dawn hle niin a lang.

Inter Milan hian Pathianni zan dar 12:15 hian Monza an lenchilh dawn. An elpui Old Lady chuan zanin dar 9:30 hian Empoli an lenchilh ve bawk ang.