Nadal a inhnuk-dawk

Rafael Nadal-a'n tennis la chawlhsan chiah lo mah se a inkhelh leh hun tur a hriat loh. Team inelna Laver Cup khelh tur aṭangin Nadal hi a inhnukdawk a, Team Europe tan a inlan thei dawn lo tihna a ni.

Kum 38 mi Nadal hi hliam vangin a buai rei ta hle, a hun hnuhnung lamah pangngai taka khelh theih a nei ta meuh lo. Paris Olympic-ah khan Carlos Alcaraz nen Spain tan doubles an khel a, quarterfinal-ah an chak lo.

Olympic hnuah Nadal hian match a la khel leh lo - tun season kal lai hi atana hun hnuhnung ni tawh tura ngaih a ni a, tournament a khel leh thei ang em, tih pawh hriat a ni tawh lo a ni.

Grand Slam vawi 22 champion tawh Nadal chuan, "Kar leh mai hian Berlin-ah Laver Cup khelh a ni tawh dawn a, ka inlan ve theih loh tur thu sawi hi hrehawm ka ti takzet.

"Inkhel ve thei lo mah ila Team Europe ka thlawp tlat dawn a, tun hma lama sulhnu ka lo neih ve tawhna a nih avangin ka ngaihlu hle bawk," tiin a sawi a, tennis chawlhsan hun erawh a la sawi rih lo.