Barca chak tluang lai a tawp

La Liga hmahruaitu Barcelona a zawnin vawi sarih an chak thei ta lo, Inrinni zan khan Sanchez Pizjuan-ah first half-a Lionel Messi leh Neymar te goal an venghim zo lo a, minute 90 zawhah 2-2 in Sevilla nen an inhnehtawk.

Luis Enrique team-te hian February 21-a Malaga goal khata an hneh loh hnua point thum an hlawhchhuak thei loh avangin Real Madrid nena an inthlauhna chu point hnih chiah a ni ta.

Catalan club-in inkhelh ṭan tirh darkar chanve chhung an thunun a, Sevilla defender Benoit Tremoulinas-a'n hmunruak a pek hnem vangin Messi-a'n minute 14-na lekah tun season-a a goal 34-na a khung. Argentine forward hian Sevilla lamah goal 19 a khung tawh a, Sevilla hi La Liga club zinga a goal khung tamna ber club a ni.

Minute 31-naah Neymar-a'n freekick aṭangin a khung a, Sevilla goalkeeper Rico Gonzalez a che lo. Brazilian forward hian La Liga match sarih chhung goal a khung tawh lo mah se goal a khung leh takah chuan ani aia khung tam chu Cristiano Ronaldo leh Messi te chiah an awm. Neymar hian goal 18 a khung tawh.

Minute 38-naah Ever Banega-a'n Sevilla tan a khung a, hun tawp hma minute rukah substitute Kevin Gameiro hmangin Sevilla-in an siphurh an sut. Sevilla hian tun season-ah an khelmualah hneh loh an la tawng lo.

Barcelona manager Luis Enrique chuan, "Point hnih kan hloh hi buaina tur a awm lo, hmahruaitu kan la ni reng tho," a ti.

Inkhel chungchang sawi zuiin Enrique chuan, "First half ṭha tak kan khel a, minute nga chhung vel kan talbuai tih loh kha chu kan khel ṭha thlawt a ni. Second half-ah erawh kan inhnehtawk a, vawi khat tihsual kha a pawi a ni," tiin chak phu zawka a inngaih thu a sawi.

Barca midfielder Andres Iniesta chuan, "Bul kan ṭan ṭha a, amaherawhchu goal khat an khung ve khan phurna thar an neih phah a ni. Second half-ah khan min rawn nawr mah se goal khung belh thei tur chu kan ni. Kan tihsual kan thlir kir ang a, insiamṭhat dan tur kan ngaihtuah nghal ang," tiin a sawi.

Barca midfielder Sergio Busquets chuan, "Hmahruaitu kan ni a, chak zel kan duh avangin point hnih kan hloh hi kan ui takzet. Chutihrualin kan draw te hi kum khat chuang anmahni khelmuala chak loh hmel hmu tawh lo an ni. Chhiarkawp dan chuan Real Madrid nena kan inthlauhna hi match khat chiah a ni a, mahse kan talbuai phah lo ang," tiin point hnih hloh vanga talbuai a inrin loh thu a sawi.

Barcelona hian Nilai zan khian Champions League quar­ter­final-ah Paris Saint Germain nen an inhmachhawn ang.