Real leh Ronaldo an kal zel

Santiago Bernabeu-ah Cristiano Ronaldo-a'n minute 21-na lekah freekick aṭangin a khung a, Real Madrid-in mikhual Eibar lakah harsatna an nei lo, 3-0 in an chak.

Inrinni zan inkhelah hian Ronaldo bakah Javier Hernandez leh Jese Rodriguez te'n goal khat ve ve an khung bawk.

European champion Real Madrid hian inhliam vangin Gareth Bale an chhawr thei lo a, hrem vangin midfielder Toni Kroos leh James Rodri­guez ten an chhawr thei lo a. Manager Carlo Ancelotti-a'n Manchester United aṭanga an hawh Hernandez chu starting eleven a dah a, Mexican forward vawi hnih bul ṭanna chauh a ni.

Goal hmasa ber hi yard 25 aṭanga Ronaldo freekick pet aṭanga lut a ni a, Eibar keeper Xabier Irureta tihsual a ni. Portuguese forward hian March 26 khan La Liga-ah Sevilla lakah freekick a khung a, tun hi khami hnua freekick aṭanga a khung lehna hmasa ber a ni.

Goal luh danah kee­per Irureta tihsual angin lang mah se Eibar coach Gaizka Garitano chuan keeper a dem lo. Gaizka chuan, "Ronaldo hi free­kick pet thiam bik a ni," tiin goal khungtu a fak.

Real Madrid hian Thawhlehni zan khian Atletico Madrid nen Champions League quar­terfinal an inhmachhawn ang. Atletico hian French forward Antoine Griez­mann goal hnih hmangin Malaga an draw hram a, he inkhelah hian Atletico forward Fer­nando Torres chuan an lamah a tauh lut.