Feyenoord-a kir tur Kuyt

Liverpool player pawimawh ni ṭhin Dirk Kuyt chuan amah siam liantu Dutch club Feyenoord a zawm leh dawn ta. Kuyt hian season tharah kum khat cham turin Dutch club hi a zawm ang.

Netherlnads tan pawha vawi tam lo inlan tawh Kuyt hian August 2006-a Liverpool a zawm hma in Feyenoord-ah hian a football nun a lo hmang tawh ṭhin a, match 101 khel hmanin goal 71 lai a khung nghe nghe. Liverpool-ah fans lawm hlawh ber pawl player nih chhunzawmin match 208-ah Reds tan a inlan a, goal 51 a khung. A taimak em avangin fak a hlawh thei hle.

Anfield-a cham chhungin League Cup a chawi bakah Champions League final a khel nghe nghe. Kum 34-a upa Kuyt hian 2012-13 season ṭan dawn khan Turkish club Fenerbahce-a zawm a, Turkey a cham chhungin Turkish Super Lig leh Turkish Cup-ah te a champion.

Fenerbahce tan match 87-a goal 26 khungtu Kuyt chuan, "Kum kua lai kan ram pawn lamah ka khel tawh a, mahni ram ngeia kir hi a hun leh tawhin ka hria a ni. Turkey-ah kum thum chamin champion theihna zawng zawngah ka champion vek a, chona thar hmachhawn hi a hun leh tawh a ni," tiin Feyenoord a zawm chhan a sawi.