Chinese Grand Prix-ah Hamilton a chungnung

Pathianni chhun khan Shanghai International Circuit-ah Formula one intlansiak hmuhnawm kan hmu a, Mercedes driver Lewis Hamilton a chungnung leh hle.

Qualifying-a che ṭha Mercedes driver te bawk a takah pawh an tlan ṭha leh a, pole position aṭanga bul ṭan Lewis Hamilton chu pakhatna a nih bakah a teammate Nico Rosberg chu pahnihna a ni. An inthlauhna hi second 0.042 chauh a ni.

Tun season intlansiak pathum awm tawh aṭangin Hamilton hian driver championship-ah point 68 hlawhchhuakin pakhatna a ni mek a, Sebastian Vettel chu pahnihna niin an inthlauhna hi point 13 a ni.

World champion vawi li lai ni tawh Vettel chu intlansiak hmasa Malaysian Grand Prix-ah pakhatna ni mah se China-ah erawh qualifying leh intlansiak takah pa­thumnaah a thleng.

Driver ngaihven hlawh McLaren driver pahnih Fernando Alonso leh Jenson Button ten beisei an pha lo a, tun season intlansiak pathum aṭangin point an la hlawh chhuak zo lo a ni.

Chinese Grand Prix pakhatna Hamilton chuan, "Kar tawp duhawm leh hlimawm tak a ni. Kan team thawh­hona a ṭha a, ka team-mate te zarah he dinhmun luah thei hi ka ni," tiin a sawi.