Mizoram Super League boruak a lian tual tual

Samsung 3:16 Plan Solution Mizoram Super League hmawr an bawk hnai a, inkhel pawh a hmuhnawm tawlh tawlh. Kar hmasa Zirtawpni tlai leh zanah khan inkhel hmuhnawm pahnih kan hmu a, match hmasa zawkah Tuikual South BC in table mawngphaha awm Chaltlang Ryders 69-62 a hnehin final luh an beiseina chhe te in an chhem nung thar leh. Inkhel hnuhnung zawkah final lut chiang tawh Khatla TBL in 60-56-a hnehin Vikings tan final luh beiseina an thai bo sak.

Tuikual South an chak e

Tlai dar 4:00-ah Hawla Indoor Stadium beisei aiin a lun a, fans nei ṭha Tuikual South leh Chaltlang Ryders te'n MSL match pawimawh an khelh vang a ni. Tuikual South in final luhna chance tlemte an la neih thamral tir mai phal lo in theihtawp chhuahin an khel a, Chaltlang Ryders in table mawng lum luahtu nih reng duh lo in an rawn khel bawk.

1st quarter an khelh ṭan tirhin beisei loh takin Chaltlang an rawn che ṭha zawk a, an point score zat pawh 17 niin Tuikual South lamin point sawm bak an tlin lo thung. Mahse, Chaltlang in beisei an phak lo chhunzawm a, 2nd quarter aṭang chuan Tuikual South in inkhel a tawp thlenga rawn thunun in chak zawkah an ṭang ta a ni.

Chaltlang Ryders in Tuikual South captain F.Zodinthara an ngam lo a, point 26 zet an lamah an score tir. Tuikual South player ṭha sawi apianga sawi hmaih thiang lo Vanchuangpuia'n a nu hriatreng na inkhelah game ropui khel in point 17 a score bakah rebound 16 zet a nei bawk. Chaltlang tan Lalremtluanga a che ṭha ber a, point 14 score in rebound panga a nei thei a ni.

Tuikual South tan final kalkawng a la ping mai lo, a game hmabak pahnihah an chung chiaha awm Zarkawt BCA an la tum dawn a, heng match pahniha an chak ve ve a, BCA in an khingpui te an hneh loh ve ve bawk chuan play-off kaltlanga MSL kheltu te hi MSL final-ah kan hmu daih thei.

Vikings beisei a bo

Mission Veng Vikings in Zirtawpni zana Khatla TBL an tum hma in MSL final luhna chance chhe te an la nei a, mahse inkhel a zawh meuh chuan an beiseina thai bo sak an ni.

Mission Veng Vikings in an thiampuipa leh innghahna Lalrina Renthlei tel lo in inkhel an hmachhawn. Khatla TBL in final lut chiang tawh sa an nihna an chhuang duh lo a, an players ṭha ber ber nen Vikings hi rawn hmachhawnin MSL match zawng zawnga chak kim vek an tum. Inkhel ṭan tir aṭangin team pahnih an inhlau lo tawn a, inhnehtawk takin inkhel tawp thleng in um zak zak mah se player tawnhriat nei ṭha ngah zawk Khatla in 60-56 in hnehna an chang ta a ni.

Mission Veng Vikings tan Moses Zoremmawia a khel ṭh a, point 15 score in rebounds 12 zet a la. Khatla tan Vanlalmuana'n a theihna rawn pholang bawkin point 16 a score bakah rebounds 8 a la bawk a ni. Vikings in an inkhelh hmabak pahnihah hnehna chang pawh nise final luhna chance an nei tawh lo.

Team DinhmuN

# Team Pld W L Pts G.Avg

1 Khatla TBL 8 8 0 16 1.19

2 Zarkawt BCA 8 6 2 14 1.1

4 Tuikual South BC 8 4 4 12 1.01

3 Mission Veng Vikings 8 3 5 11 0.97

5 Zarkawt Serpents 8 2 6 10 0.93

6 Chaltlang Ryders 8 1 7 9 0.87