French League Cup champion PSG

Paris St-Germain chuan Zlatan Ibrahimovic leh Edinson Cavani goal hnih ve ve thun hmangin Bastia chu 4-0 in an hneh a, a vawi ngana atan French League Cup champion an ni.

Sweden striker Ibra­himovic chuan minute 20-ah an hmahruaina goal penalty aṭangin a thun a, penalty chawitu Bastia captain Sebas­tien Squillaci chu hnawh­chhuah a ni. First half zawh hmain Ibrahimovic hian an goal hnihna a khung a, second half-ah Cavani-a'n goal hnih a khung leh bawk. Uruguayan forward hian nikum League Cup final-ah goal hnih a lo khung tawh bawk.

Tun season-ah Laurent Blanc-a naute hi an che ṭha hle a, champion nomawi pali an beisei zinga pakhat chu an chawi ta a. French Ligue 1, Coupe de France leh Champions League-ah champion beiseina an la nei vek bawk.

PSG-in chamchin lawmawm tak an neih mek lai hian chanchin duhawm lo an nei ve tho a, an striker Ibrahimovic chu game li khel thei lo tura hrem a ni a, hei hi thla hmasa a Bordeaux nen an inkhelh ṭuma ṭawngkam mawi la tak a hman vang a ni. Ligue 1 match-ah Nice, Lille, Metz leh Nantes a hmachhawn thei lo ang. Champions League-ah pawh last 16 a Chelsea nen an inkhelh ṭuma red card a hmuh avangin quarter final first leg-ah Barcelona a hmachhawn thei dawn lo.

Eng nge an sawi?

PSG manager Lau­rent Blanc chuan, "Kan khel ṭha hle a ni. Mimal khelh ṭhat aiin kan vaia khelh ṭhat a pawimawh tih kan hmu chiang hle. Champions League a Barcelona kan hmachhawn tur atan inbuatsaihna ṭha tak a ni, kan champion hian inrintawkna nasa tak min pe ngei ang," tiin a sawi.

Refree thutluknaa a lawm loh thu sawiin Bastia manager Ghislain Printant chuan, "Inkhel ṭan aṭanga minute 20-ah khan inkhel a tawp tawhah ka ngai, refree thutlukna kha hriat thiam a har hle a ni. Penalty kan chawi bakah kan player hawnhchhuah a ni bawk. PSG ka lawmpui a, mahse kan result-ah erawh ka lawm lo," a ti.