Bayern in an dinhmun sawh nghet
Bayern Munich chuan Bundesliga-ah an hmahruaina an sawh nghet zel a, Inrinni zan khan Eintracht Frankfurt chu 3-0 a hnehin table-ah point 10 in hma an hruai fal mek. Bayern chak lai hian Borussia Dortmund erawh Borussia Monchengladbach 1-3 in an tlawm.
Bayern tan hian Polish striker Robert Lewandowski-a'n goal hnih a khung bakah Germanforward Thomas Muller-a'n goal khat a khung ve bawk.
Lewandowski hian Bundesliga tun season-ah goal 16 a khung tawh a, goal khung hnem ber dawttu a ni mek. Ani aia khung tam awmchhun chu goal 19 khung tawh Eintracht Frankfurt attacking midfielder Alexander Meier a ni.
Borussia Dortmund season a fuh tak tak thei lo, Inrinni zan inkhelah Monchengladbach tan Oscar Wendt, Raffael leh Havard Nordtveit te'n Dortmund goal-ah an khung a. Ilkay Gundogan-a'n Dortmund tan khung ve mah se awmzia a nei tawh lo.
Dortmund hian Bundesliga match 28 khelh tawh aṭangin point 33 chauh an la hlawhchhuak a, table-ah 10-na an ni mek. An hneh loh Monchengladbach erawhin point 53 hmiin table-ah pathumna an ni mek a, kumthara Champions League khelh an tumna an chhawm nung zel.
Borussia Monchengladbach head coach Lucien Favre chuan, "Kan duh leh beisei ang result kan nei thei a, kan lawm hle. Season tawpah a sang thei ang ber a awm kan tum ang," tiin a sawi.