Hmalam panin Arsenal an kal zel
A zawna match riat chak zawn theih hi thil awlsam a ni lo, Premier League-ah phei chuan thil harsa tak a ni. Mase Arsene Wenger-a nau ten an ti thei. Inrinni zan khan an khingpui Burnley chu 1-0 a hnehin a zawnin EPL-ah match riat an chak ta.
Burnley khelmual Turf Moor a inkhelah hian mikhual Arsenal in inkhel an thunun in an chungnung zawk a, mahse goal erawh an thun tam bik lo. Chak lo lam Burnley hi EPL match 32 an khelh tawh aṭangin point 26 chauh an la hlawhchhuak a, relegate thei dinhmunah an ding mek.
Kum 24-a upa midfielder Aaron Ramsey chuan minute 12-naah he inkhel a goal awmchhun hi a khung a, tun season-ah a club tan goal kua a khungna chiah a ni. Burnley tan Ashley Barnes chuan goal khungna hun ṭha vawi hnih nei mah se a hun ṭha hmuh a chhawrv ṭangkai zo lo.
Arsenal lam tan Alexis Sanchez leh first half a goal khungtu Aaron Ramsey ten Burnley tlar hnung chhaihbuai ṭhin mah se minute 90 chhungin goal dang an thun belh thei tawh bik lo. Khual mualah 1-0 a chakin point thum hlu tak an hlawh chhuak.
Arsenal hian point 66 hmuin League-ah pahnihna dinhmun an luah mek a, hma hruaitu Chelsea nen an la inhmachhawn dawn avangin season tawp lamah Champion tum inum boruak a nung thar leh hle.
Manager ten eng nge an sawi?
Burnley manager Sean Dyche chuan, "Chak turin theihna leh thiamna kan nei, mahse result ṭha kan hmu lo ṭhin hi a pawi a ni. Goal kan chhuah hnu kha chuan ṭha takin kan khel chhunzawm mai a, mahse a pawi ber chu goal kan khung thei lo leh goal kan chhuah tlat ṭhin hi a ni," tiin an chak loh pawi a tih thu a sawi.
Arsenal manager chuan, "Zanin kan chak nana pawimawh tak pakhat chu kan tlarhnungte an ni. Burnley khan an khel chhe lo a, tlak hlau an nih tawh avangin an theih tawpin an bei a, an fit hle bawk. Inkhel harsa takah point thum kan hlawhchhuak thei hi ka lawm a ni," a ti.
Sawi chhunzawmin French manager chuan, "Tunah hian kan khel ṭha chho rih hle a, League-ah hian enge thleng dawn a la hriat loh. Tunah chuan inringtawk leh nuam ti takin kan inkhel thei a, FA cup kan khelh tur atan rilru kan seng leh rih tawh ang. Kan game hnuhnung 18 aṭangin vawi 16 kan chak thei a, kan puitling tawh hle," tiin a sawi.
Inkhel Results
Swansea City 1 - 1 Everton
Southampton 2 - 0 Hull City
Sunderland 1 - 4 Crystal Palace
Tottenham 0 - 1 Aston Villa
West Brom 2 - 3 Leicester City
West Ham 1 - 1 Stoke City
Burnley 0 - 1 Arsenal
Team Dinhmun
# Team Pld GD Pts
1. Chelsea 30 37 70
2 Arsenal 32 31 66
3 Man Utd 31 27 62
4 Man City 31 33 61
5 Southampton 32 22 56
6 Liverpool 31 9 54