I League Second Division Chanmari FC an chak leh thei ang em?
Vawiin hian Siliguri-ah I League Second Divison khelh chhunzawm a ni dawn a, match hnih chak hmel hmu tawh lo Chanmari FC-in dar 9:30-ah PIFA nen SSB Ranidanga Ground-ah an inkhel ang. He hun vekah hian Kanchenjunga Stadium-ah match zawng zawng la chak vek Aizawl FC-in Kolkata club United SC an hmachhawn bawk ang.
Chanmari an chuai lo
MPL2 champion Chanmari FC coach H. Vanlalthlanga chuan, "Chanmari FC hi kan tlahniam tihna a ni lo, kan la vanduai rih mai a ni. Referee hian min la ṭan thei lo a, lai taka an ham tawh kan beisei, keini chuan kan theihna zawng zawngin kan khel ang," tiin an la tlak hniam loh thu a sawi.
Chanmari FC hian Lonestar Kashmir FC an hneh loh ṭum leh Mohammedan SC an draw ṭumin goal khung hamsa zawk ve ve mah se penalty an chawi ve ve vangin point thum an hlawhchhuak lo.
Thlanga chuan penalty chungchang sawiin, "Mohammedan nena kan penalty chawi dan kha chu a mak khawp mai. Keeper AwP-a'n ball a hnek chhuak kha, referee-in player hnek tuma chhuahin penalty a pe daih. Chumai a ni lo, striker Valpuia'n a la tlang vek tawh a, a pet goal tur an pet thlu. Penalty leh red card kan beisei laiin kan player-in yellow card a chawi thung," tiin referee thutlukna hriatthiam a har thu a sawi.
Chanmari FC hmachhawn tur PIFA hian point khat chiah an la hmu a, an match hnuhnung berah Aizawl FC-in 6-1 in an sawp. Chanmari tan insiamṭhatna hun remchang a ni a, mah se Thlanga'n a awlsam loh tur thu a sawi. Chanmari boss chuan, "I League Second Division chinah chuan chak a harsa em em a, PIFA pawh hi an awlsam lo ang," tiin a sawi.
Chanmari FC hian Mohammedan laka hnawhchhuah defender Lalrinchhana leh inhliam Lalruatthara te an chhawr thei lo ang.
Aizawl FC fiahna
MPL3 champion Aizawl FC an la chak vek, vawiin hian an tlo tak tak em tih fiahin an awm ang. Aizawl FC hmachhawn tur United SC hi I League Second Division hmasa bera champion an ni. Kolkata club hian Eric Brown an nei a, Liberian forward hian goal li a khung tawh. Aizawl FC hi la chak vek mah se match tinah goal an la chhuah vek a, MPL3 best player Lalramchullova chu hrem vangin a inlan thei dawn lo.
Tlar hnung lama Aizawl FC innghahna tur chu Emma Chigozie a ni a, Nigerian defender pui tur hian Lalṭhakima, Immanuel HS Lalṭhazuala, Thomas Lalengkima leh Lalrozama te chhawr theih turin an awm.
Aizawl FC player-te an dam kim a, MPL2 best player R. Malsawmtluanga pawh chhawr theihin a awm tawh. Midfield-ah MPL club an ngaihtuah awm lo a, tlar hmaah Liberian forward Alfred Kemah Jaryan leh Nigerian forward Justice Morgan te inkarah duh thlan tur an nei bawk.
Aizawl FC coach K. Malsawmkima chuan, "Boruak a lum telh telh a, a ninawm zawng pawhin a ninawm ta riau mai. Amaherawhchu match hnih chiah Siliguri-ah kan khel tawh dawn a, kan theihna zawng zawng kan chhuah a ngai a ni. Point hloh a thiang lo a, chak zel hi kan duh a ni," tiin asawi.
Aizawl FC hian Siliguri-a an match hnuhnung berah Chanmari FC an hmachhawn dawn a, MPL ngainatute'n an inkhelh hun tur April 16 an thlir tawh.
FIXTURES & STANDINGS
ROUND 6 : April 13, Thawhṭanni
Kanchenjunga Stadium
9:30 AM United SC Vs Aizawl FC
3:15 PM Lonestar Kashmir FC Vs Hindustan FC
SSB Ranidanga Ground
9:30 AM Chanmari FC Vs PIFA
3:15 PM Kenkre Vs Mohammedan SC
ROUND 7 : April 16, Ningani
Kanchenjunga Stadium
9:30 AM Aizawl FC Vs Chanmari FC
3:15 PM PIFA Vs Kenkre
SSB Ranidanga Ground
9:30 AM United SC Vs Lonestar Kashmir FC
3:15 PM Hindustan FC Vs Mohammedan SC