Southampton-in an record an chhawm nung

Southampton chuan Premier League-ah Liverpool tlanpel in pangana-ah an inhlangkai a, Inrinni zan khan relegate thei dinhmuna ding mek Hull City chu 2-0 in an hneh a ni.

St. Mary's Stadium-a inkhel­ah hian Southampton tan penalty aṭangin substitute James Ward-Prowse chuan goal hmahruai a khung a, striker Graziano Pelle chuan Premier League match 15 chhung goal a khung loh hnu in Saints tan goal a khung ve leh ta bawk.

First half chhung zawng goal kan hmu lo a, second half-ah goal hnih kan hmu thung. Hull defender Alex Bruce chuan penlaty box chhungah Hull striker hlui Shane Long a tih tluk vangin penalty a chawi a, Ward-Prowse chuan penalty hi petin goal a khung. Minute 81-ah Graziano Pelle chuan tun season-a a goal 13 na rawn khung ve in 2-0 in Saints in hnehna an chang ta a ni.

Inkhel behbawm

Ronald Koeman-a nau te hian season hmasa a an club record an lo siam tawh Premier League-a an point hmuh san ber point 56 chu nihrual in an khum ngei a rinawm. An khelmuala an game hnuhnung pathumah chak hmel hmu vekin an khingpui Hull erawh a zawna an chak loh vawi thumna a ni thung.

Hull hi table-ah 17 na ni mekin relegate hlauhawmah an awm mek a, an la khelh leh tur zingah Premier League club ṭha ṭhiau Liverpool, Arsenal, Tottenham leh Manchester United an tum dawn vangin Premier League-a in ham tang tur chuan hma an sawn a ngai hle ang.

Koeman thukhawchang

Southampton manager Ronald Koeman chuan, "First half-ah keini aiin Hull an khel ṭha zawk. Mahse, second half-ah penalty kan hmu hlauh a, kha khan kan game min hawnsak ta a ni," a ti.