Liverpool hlim niten rei an daih lo!

Arne Slot-a hnuaia an match hmasa pathumah Liverpool an chak vek a, international break hmaa an hneh hnuhnung ber chu an hmelma kumhlun Manchester United an ni a, an chakna hmun pawh Old Trafford ngat a ni.

Reds fan-ten ngaihngam takin international break an hmang a, champion an sawi ri. Mahse, champion an sawi rikna chil per pawh a hul fel hmain Liverpool an tlawm a, Nottingham Forest chu 1-0 in an ngam lo - Forest hi tun season-ah an la tlawm lo tluang zel.

Kum 1969 hnua Anfield-a Nottingham Forest-in Liverpool an ngam hmasak ber a ni a, Callum Hudson-Odoi chuan inkhela goal awmchhun a khung - hun tawp thlengin Reds-in a chhanletna tur an nei lo a, Anfield-ah an tlawm.

Slot-a'n Jurgen Klopp-a kalsan squad ṭha tak chhawmin, a chei hnum a, mahse, Inrinni zana Anfield-a lang chu Klopp-a hnuaia 'beih hram hramna' kha Reds hian an nei ta lo em ni chu aw, tih mai tur a ni. Liverpool hian September 17, Thawhlehni zan dar 12:30-ah Champions League khel turin AC Milan an lenchilh zui dawn.

A ṭhelhtute!

Anfield-ah rin lawk ang ngeiin Liverpool-in inkhel an thunun a, mahse, a pawimawh ber goal an khung thei tlat lo - Forest tlarhnung an inrem ṭha a, first half chhung zawngin shot nei lo mah se, goal venhim chu an hna ber a nih miau avangin hna an thawk ṭha.

Reds tana chance ṭha bera chhal ngam chu Luis Diaz a ke bulah a tla a, mahse, Colombian forward hian ṭha taka ball a lakluh hnuah goal-ah a chantir thei lo. Reds tan Virgil van Dijk chuan hnai set sawtah chance a nei bawk a, mahse, Dutch defender ṭha hian a hun duhawm neih chu goal-ah a chantir thei bik lo.

Forest keeper Matz Sels a che ṭha a, Alexis Mac Allister khung ngei tura ngaih a dante chu pui tak a ni. Sels hi a hnuah Diaz-a lakah a chesual zauh a, awlsam taka man tur chu a thlauh. Mahse, goal a luh hmain, goal line aṭangin a hum leh hman a, a vannei tih loh rual a ni lo.

Liverpool-in inkhel thunun chungin goal an khung lo a, Forest lamin Alisson an hnim hnaih loh hrim hrim avangin fan-te erawh an hlauthawng lo a, second half-ah goal khung mai an inring.

Mahse maw...

Slot-a'n chak a duh a, Conor Bradley luhtirin Trent Alexander-Arnold chu midfield-ah a tawlh chhoh tir a, Cody Gakpo leh Darwin Nunez te bench aṭanga an luh theih bawk avangin Reds hi Forest laka chak turin an ṭha tawk.

Mahse, Forest boss Nuno Espirito Santo-a'n Anfield-ah 'risk' a la ngam lo a, first half-a goal an chhuah loh vangin a lungawi mai dawn emaw tih lai khan Hudson-Odoi leh Anthony Elanga te goal nawr turin a luhtir a, a tifuh.

Hudson-Odoi hian minute 72-naah ṭha zetin goal a khung a, Anfield a ngawihtir - Elanga pawhin hun ṭha a nei a, Alisson a paltlang ve thei lo thung. Reds hian Mohamed Salah leh VVD hmangin chance nei mah se an chhawr lo a, Forest lakah an tlawm.

Feyenoord aṭanga Liverpool pantu Slot-a'n Premier League nunrawnna a tem a, team tenau lakah a team a tlawmpui. Dutch coach tan December 2023-a Champions League-a Celtic laka Feyenoord a tlawmpui hnua a tlawm leh hmasak ber a ni.

========

"Ball kan chang tam em em a, mahse, chance ṭha tia sawi tur chu vawi thum emaw vawi li emaw vel chauh kan nei - khati taka kan nawr chunga khati zat lek chance insiam kha a fuh lo a, hotea ngaihah ball kan hloh leh ṭhin bawk. Mahni muala tlawm kan ni a, kan hnungtawlh tihna a ni. A bik takin, an vanneih viau chuan Champions League khelh phak beisei thei, a sang bera top 10 chunglam awm ngai lo team laka kan tlawm a nih chuan a lawmawm lo lehzual a ni." - Arne Slot, Liverpool manager