Weightlifting-a India aiawh tur Bungzung tlangval Ruatfela

Commonwealth Junior leh Senior Weightlifting Championships-ah Bungzung tlangval Lalruatfela chu India aiawhin a tel dawn. Inelna hi Suva, Fiji-ah vawiin aṭangin ṭan a ni dawn a, September 21, 2024 thleng a awh ang.

Mizo tlangval Ruatfela hian mipa 89 kg weight category-ah Junior leh Senior-ah inelna a hmachhawn dawn. National leh international level-ah Ruatfela hian record ṭha tak a nei a, a chawi sual lo a nih chuan tun ṭumah pawh medal la ngei tura beisei a ni.

Ruatfela hi kum 2019 khan Mizoram Weightlifting Academy Ramhlun Sports Complex-ah MSSC Weightlifting NIS coach Zohmangaiha bul aṭangin a inzir chhuak a, April 2023 khan National Centre of Excellence (NCOE) Patiala, Punjab-a training turin an thlang.

Tun ṭuma India aiawh turte pawh hian Patiala, Punjab-ah national camp an nei a, September 14, Inrinni tlai khan inelna tur Fiji panin India ram an chhuahsan. Mizoram Weightlifting Association chuan Lalruatfela chungah beiseina sang tak an nei a, duhsakna an hlan bawk.