ISL-ah Mizo inlan an tam

Indian Super League 2024 chu September 13, Zirtawpni zan khan khelh ṭan a ni ta a, Mizoram player inlan an tam nghal hle - Mizo player 13 ngawtin ISL kar hmasa berah match an khel nghal a, nizanah Kerala Blasters leh Punjab FC an inkhelh zui avangin Mizo player inlan hi an pung leh ang.

Tun season ISL match hmasa berah season hmasa final rematch kan hmu a, Mohun Bagan leh Mumbai City an intawng - Kolkata khawpuiah team pahnih hi 2-2 in an inhnehtawk a, a chak zawk an awm lo.

A tawpah Mumbai

Mohun Bagan tan Lalengmawia Ralte chuan inkhel bul a ṭan a, Mumbai City lamah captain Lallianzuala Chhangte leh Hmingthanmawia Ralte ten bul an ṭan bawk. Bagan hian first half chhungin Tiri (own goal) leh Alberto Rodriguez hmangin goal an khung.

Goal dang lut loa chawlhlawk hman a nih avangin Kolkata club hian hnehna an chan mai a rinawm. Mahse, champion lai Mumbai an beidawng duh lo. Spanish defender Tiri chuan a tihsual thup mawi nan minute 70-naah si phurh a sut ṭhen a, minute 90-naah Syria international Thaer Krouma chuan Mumbai si phurh a sut zo.

Mumbai tan Lianzuala inkhel a hmuhnawm a, Lunglei tlangval hian goal khung lo mah se, Bagan tlarhnung vawi tam a chhaih buai a, defender Valpuia a nghet viau bawk - pressure sang hnuaiah Apuia a talbuai lo a, Bagan midfielder thar hi Kolkata club-in champion an tumna kawngah player pawimawh a nih chhunzawm zel ang.

Odisha an tlawm

Team ṭha Odisha FC-in beiseina sang tak nen season bul ṭan mah se, an match hmasa berah Chennaiyin chu 3-2 in an ngam lo nghal - Odisha hian minute kuana lekah Diego Mauricio-a penalty hmangin goal hmahruai khung mah se, South Indian club hian Farukh Choudhary goal hnih leh Daniel Chima Chukwu goal khat hmangin an chhanglet a, 3-1 a ni daih!

Hun pek belh minute nganaa Roy Krishna khungin Odisha a chhem harh hman tawh lo - Odisha tan Isak Vanlalruatfela leh K. Lalṭhathanga ten inkhel bul an ṭan a, Jerry Lalrinzuala leh Jerry Mawihmingthanga te bench aṭangin an lut bawk.

Chennaiyin tan player thar PC Laldinpuia, Laldinliana Renthlei leh Lalrinliana Hnamte ten inkhel bul an ṭan nghal vek.

East Bengal tlawm

Inrinni zan inkhel dangah Bengaluru chuan 1-0 in East Bengal an hneh a, Vinith Venkatesh chuan minute 25-naah inkhela goal awmchhun hi a khung - hun tawp thlengin goal dang a lut tawh lo a, Kolkata club an tlawm nghal.

Bengaluru tan Lalremtluanga Fanai chu bench aṭangin a lut a, East Bengal-ah David Lalhlansanga chu bench aṭanga lutin Lalchungnunga'n inkhel bul a ṭan - Durtlang tlangval hi minute 87-naah hnawhchhuah a ni a, tun season ISL-a hnawhchhuah hmasa ber a ni.

Zanin dar 7:30-ah Mohammedan SC an inlan dawn a, anni hian Durand Cup champion NorthEast United an mikhual ang.