Ramhlun = SYS; Sihphir Venghlunin Chanmari an sawp

LZ Juice MPL11-ah semifinal khelh inchuh boruak a nung chho zel. Inrinni chhun khan SYS FC leh Ramhlun Athletic te 1-1 te an inhnehtawk a, Lunglei club hian Danny Lalduhawma hote aiin point khatin an hmu tam zel. Mahse, tlai inkhelah Sihphir Venghlunin Chanmari FC 4-1 in an sawp a, Mamit Luangpawl tlangval Lalthanpuia chu 'hero' a ni.

Chanmari FC erawh Sihphir Venghlun an hneh loh avangin pahnihnaah an tla thla a, Aizawl FC-in hma an hruai ta thung. Club ṭha pahnihin semifinal an khel dawn a, league champion tur erawh a la chiang lo. Semifinal khel tur dang pahnih hi a la chiang lo a; Mizoram Police, Sihphir Venghlun, SYS, Ramhlun Athletic leh Chawnpui ten beiseina sang tak an la nei vek.

Incho tawk

SYS FC-in Ramhlun Athletic an hmachhawn hmasak ṭumin an hneh lo a, Inrinniah erawh Lalmuankima hoten chak tumin bul an ṭan a, an goal bawh pawh a na. Lunglei club-in an phu angin minute 21-naah Mesak C. Lalrindika hmangin hma an hruai bawk.

Chutihrualin, Ramhlun hian rawlthar ṭha rual awm khawmna hi an hlau bik lo a, an inngam dun bawk a, goal chance pawh a tam. SYS vanneih ṭum ni se, goal dang khung belhin point thum hlawh chhuak thei tur an ni.

Mahse, SYS-in goal hnihna an khung thei lo a, Ramhlunin Benjamin Lalnunpuia hmangin an khung ta zawk. Minute 80-naah Isak Vanlalpeka freekick ṭha zet chu SYS keeper-in dang ṭha tawk loin Benjamin hian siphurh sut nan a hmang a, ani hian an intawn hmasak ṭumin chakna goal a khung tawh bawk.

Hun tawp lamah SYS-in chance ṭha an nei leh tho a, Ramhlun keeper Lalhriatpuia'n a dan ṭhat zarah 1-1 in inkhel a tawp a, Danny Lalduhawma hoten point khat hlu tak an hlawh chhuak.

Tepuia Show

I League 3 final round lut tura khingpui zawng zawng hnehtu Chanmari FC-in Sihphir Venghlun lakah bul an ṭan ṭha a, K. Lalhmangaihkima hmangin minute hnihna lekah goal an khung nghal.

Lalsangzuala Hmar hote hian Hmangaihkima leh Moses Lalrinzuala te hmangin goal dang khung belhna remchang an nei a, an hun ṭha neih an bawhpelh a, inkhel a danglam phah.

Chanmari FC-in player ṭha ṭhenkhat an hahdamtir an tuar a, chutihrualin Sanga hote hian I League 3 khelh tukah Aizawl FC an draw thei tih hriat a ṭha. Hei vang hian Sihphir Venghlun khelh ṭhat hi sawi nep chi a ni lo a, Robert Laldinthara hote hi an khel ṭha hrim hrim.

Aizawl FC Academy aṭanga inzirchhuak Tepuia'n Sihphir Venghlun tan hattrick a siam a, Malsawmtluanga Pautu-in injury time-ah chak nemnghetna goal a khung. Tepuia hian MPL11-ah goal ruk a khung tawh a, Ramhlun forward Felix Lalruatsanga (8 goals) leh Lalbiakdika (7 goals) te chauh a tluk lo.

Sihphir Venghlun coach Robert Laldinthara chuan, "Huhang ngah leh sulhnu nei lian Chanmari FC lakah vanneihna kan chang hlauh hi coaching staff-te leh players te kan lawm takzet. Kan vanneihna hian team chhungah a ṭha zawnga nghawng a neih zel ka beisei. Semifinal lam kan la ngaihtuah lo. Tunah chuan kan khingpui leh tur Mizoram Police chauh kan ngaihtuah. Chakna chang turin theihtawp kan chhuah zel ang," tiin Vanglaini a hrilh.