Chelsea tan Nkunku

Substitute Christopher Nkunku chuan hun tawp dawnah goal awmchhun a khung a, yellow card 14 tehmeuh an phawrhna inkhelah Chelsea chuan Bournemouth chu 1-0 in an hneh.

Inrinni zan Vitality Stadium-a inkhelah Cherries hian hmahruai theihna remchang lutuk an nei, mahse chawlhlawk hma deuha an penalty hmuh chu an player man tam ber, pound maktaduai 40 zet senga an lak Evanilson chuan a hlah.

Evanilson-a penalty pet hi Blues goalkeeper Robert Sanchez chuan a lo dansak. Marcus Tavernier leh Ryan Christie ten woodwork an tihper bawk a, an vanneih zan ni se la chuan an mikhual lakah goal an khung ngei ang.

Hun tawp dawnah erawh Nkunku kan hmu, bench aṭanga lut Nkunku hian goal awmchhun a khung, a siamsaktu chu Manchester United chhawr duh loh Jadon Sancho a ni.

Inkhel boruak a nung a, player an indim vak lo. Bournemouth player paruk leh Chelsea player pariat ten yellow card an hmu, player 14 zetin card an hmu tihna a ni a, record thar an siam.

Tun hmain Premier League inkhel vawi khat a yellow card ṭum 12 pawrhna vawi hnih - (Chelsea v Spurs 2016) leh (Wolves v Newcastle in 2010) a lo awm tawh, record dinglai hi an rawn khum ta chiah a ni.

Chelsea manager Enzo Maresca chuan, "Yellow card phawrh zat hian min ti buai lem lo, inkhel ṭhenkhatah hi chuan hetiang thil hi a thlen ve a ngai ṭhin," tiin a sawi a, a naute khelh dan a sawisel lem lo.

Maresca hnuaia indin thar tum mek Chelsea hian an match lehpekah chuan West Ham an hmachhawn dawn. London Derby an khel zui dawn a, inkhel boruak sang leh lian bawk an hmachhawn dawn tihna a ni.