Man United-in Saints an hneh

Manchester United-in Liverpool an hneh loh avanga an mualpho hnuah St Mary's Stadium luhchhuahin mualneitu Southampton 3-0 in an sawp. Matthijs de Ligt-a'n Man United tana a goal hmasa ber a khung a, Marcus Rashford leh Alejandro Garnacho ten goal khat ve ve an khung belh.

Inrinni zan inkhelah Man United-in inrintawkna an la nei lo tih a lang a, inkhel ṭantirh lamah an talbuai. Diogo Dalot-a'n ṭul lo takin penalty a chawi a, Cameron Archer-a pet chu keeper Andre Onana-a'n hming chher nan a hmang. Saints-in an penalty hlah an tuar a, United erawh an phur phah thung.

Erik ten Hag-a hoten corner kick an hmang ṭangkai a, Chritian Eriksen-a amah pawttu Bruno Fernandes pein Portuguese midfielder ball vawrhluh ṭha bik chu De Ligt-a'n minute 35-naah a tauh lut.

Saints tan Aaron Ramsdale a khel ṭha a, mahse Arsenal keeper hluiin a dang vek thei lo. Minute 41-naah Rashford-a'n box pawn aṭangin goal ṭha bik a khung a, tun season-a a goal khung hmasa ber a ni. English forward hi tun hnaiah tlahniam deuh mah se Ten Hag-a'n a ring tlat a, goal hmangin Dutch manager rinna a chhanglet.

Second half-ah Man United-in inkhel an thunun a, goal hmuh tur a awm mai lo. Saints captain Jack Stephens-a'n hlauhawm taka Garnacho a tlawh avangin hnawhchhuah a ni a, player 10 lakah United-in chance an ngah sawt.

Injury time-ah Casemiro pass class zet chu Dalot-a'n box chhungah changin, Portuguese wing back cross chu Garnacho-a'n kawh zetin a pet lut. Man United 3-0 in an chak a, lawmna tur an ngah ang.

International break-a khelh ṭhat loh anga first half-a thlak ngai De Ligt-a'n goal a khung bakah a khel ṭha a, inhliam vangin hun tawp dawnah thlak ngai mah se Dutch defender hi a hliam na lo. England team tana khel tura kohna dawng lo, Rashford-a'n goal a khung leh ta a, kum 26 mi hian a theihna sang tak hi a rawn lantir theih chuan Ten Hag-a tan player pawimawh a ni chho ang.

Liverpool laka chesual ngun Casemiro pawh bench aṭanga rawn lutin goal luh theih nan a theihna sang bik a rawn pho chhuak. Goal hmaah player thar Joshua Zirkzee hriam tawk lo mah se pass ṭha tak a nei a, team tana ṭangkai thei tur a ni.

Man United-in Saints lakah goal an chhuah lo a, Lisandro Martinez-a'n fak a phu. Ten Hag-a'n player pawimawh Rasmus Hojlund, Luke Shaw, Leny Yoro leh Mason Mount te hliam vangin a chhawr thei lo tih hriat a ṭha a, chutihrualin Saints hi tun season-ah an la chak lo vek tih hriat a ṭha bawk.