Goal nen Messi a lo kir

Lionel Messi-a hliam a dam tawh a, a thiam thil a la theihnghilh lo - Inter Miami forward hi nimin zing khan rawn kirin goal hnih a khung nghal, a club hi Philadelphia lakah 3-1 in hnehna a chanpui.

Chase Stadium-ah mikhual Philadelphia tan Mikael Uhre chuan minute hnihna lekah goal hmahruai a khung, anmahni mualah Messi leh a ṭhiante mualpho thei dinhnunah an ding.

Mahse, Inter Miami hian midang neih ve loh Messi an nei - Argentina captain hian Luis Suarez-a ball pek chu a siamrem a, amah vengtu a bum hnuah goalkeeper Andrew Vincent Rick dan phak loha kilah a khung.

Philadelphia an insiamṭha hman lo, goal luh aṭanga minute li hnu lekah Messi bawk kan hmu nawn. Barcelona lama a khelh pui ṭhin Jordi Alba-a cross chu laklawh nei miah loin a khung, tun hma lama Messi-a goal kan hmuh ṭhin ang kha a ni, hun tawp dawnah Suarez chuan an chak a nemnghet ve bawk.

Copa America final an khelh ṭumin Messi hi a kerek a hliam a, inkhel thei loin hun rei tak chhung a awm. World Cup qualifying pawh a khel thei lo hial, tunah erawh harsatna nei loin a inkhel thei ve leh ta a ni.

Kum 37 mi Messi hian club leh ram tan goal 840 a khung tling ta a, inkhelh a la chawlhsan loh avangin a khung belh zel pawhin a rinawm.