Man City leh Haaland an kal zel

Premier League champion lai Manchester City-in season bul an ṭan ṭha a, Inrinni zan khan Erling Haaland-a goal hnih hmangin Brentford 2-1 in an lehthal a, tun season match li khelh tawhah chak vek awmchhun an ni.

Etihad Stadium-ah Brentford-in mualneitu an barakhaih a, second 23 lekah goal an khung nghal. Dinglam aṭanga Nathan Collins-a cross luh chu vei lam aṭangin Keane Lewis-Potter-a'n a tauh let a, City defender John Stones-a'n pet pialin Yoane Wissa-a'n goal ruakah tauh lut.

City an insiamrem nghal a, goal an chhuah hnuah inkhel thununin an intih ṭhin dan angin ball an inpe kual ṭha hle. Minute 19-naah Kevin de Bruyne-a'n box chhungah ball changin Belgian midfielder aṭanga ball per chhuak chu Haaland-a'n vawi khatah kawh zetin a ke dinglam a pet goal nghal.

Mualneitu an che ṭha zel a, minute 32-naah goalkeeper Ederson-a ball vawrhchhuah chu Haaland-a'n a um luh hmain tharum leh thluak hmanga Bees defender Ethan Pinnock a dah ṭha phawt a, Norwegian hian goalkeeper chiah hmachhawn tawhin a ke vei lamin cool takin a khung.

Man City-in inkhel an thunun zel. Norwegian striker hian City tan goal 99 khung tawhin hattrick bakah club tana goal 100 khung theihna remchang nei mah se a vannei tawk lo. Haaland-a'n ban a pet per bakah goalkeeper Mark Flekken-a'n ṭha takin a dansak bawk.

Haaland hian tun season Premier League-ah goal kua a khung der tawh a, City tan match 103 khel tawhin goal 99 a khung der tawh. Premier League bikah match 70 aṭangin goal 72 a khung tawh a, a inhliam lo a nih phawt chuan record a siam belh zel ang.

Manchester City-in Premier League-ah bul an ṭan ṭha a; September 18, Nilaini zan hian Champions League-ah Inter Milan an mikhual dawn. Kar laihawlah City-in UCL khel dawn mah se Pep-a'n Haaland a khelh tluan tir a, Inter lakah pawh hmun pawimawh a chang ang.