Bayern Munich chakna Harry Kane

Harry Kane chuan Bundesliga kai thar Holstein Kiel lakah zahngaihna a lantir lo - England captain hian hattrick siamin Bayern Munich chu 6-1 in a chakpui a ni.

Vincent Kompany enkawl Bayern Munich hian tun season Bundesliga match vawi thum an khelh tawhah hnehna an la chang vek, chak kim thei awmchhun an ni rih a, season hmasa champion Bayer Leverkusen lak aṭangin nomawi chhuhsak an tum na hle.

Holstein Kiel khelmualah hamrik hmasa a ri a, second 13-na lekah Jamal Musiala chuan goal hmahruai a khung, a siamsaktu chu Kane a ni - English striker hian an khingpui tlarhnung chetsual karah a khung zui bawk.

German rama football inelna sang berah Musiala goal khung hi a rang ber a ni a, tun hma lama record lo siam tawh Karim Bellarabi ( 2014/15) leh Kevin Volland (2015/16) te a nih rual ta chiah.

Kompany-a naute hian a khat mawi tawkin goal an khung chhunzawm reng a ni ber mai. Nicolai Remberg chuan anmahni lamah a tilut a, Kane-a'n hattrick a siam karlakah Michael Olise chuan goal khat dang a lo khung ve bawk a ni.

Tottenham striker hlui Kane hian season hmasa mai khan Bayern Munich hi a zawm, tunah chuan Bundesliga team 18 a hmachhawn lakah goal a khung kim ta vek a, hun rei tak a nghah tawh nomawiin zui thei se la a duhthusam a ni ngei ang.

Bavarians manager Vincent Kompany chuan, "A zawna vawi thum kan chak hi lawmna tur a ni, chutihrualin match kan la khel tlem hle tih erawh hriat tel a ṭha. Bayern chu a chung bera awm tur kan ni a, kan nihna hi kan hlatsan loh ka beisei.

"Season hman tur a la thui hle, kan tawpna tur sawi lawk chi a la ni lo. Tun ang zela kan khel ṭha a nih erawh chuan a tawpah kan lawm ang," a ti a, a naute chu season hmasa lama an hloh Bundesliga title laklet pui a tum hle.

Inkhel dangah Bayer Leverkusen chuan Hoffenheim chu 4-1 in an hneh ve thung. Xabi Alonso naute hi an match hmasa zawkah RB Leipzig lakah an chesual zauh a, tun ṭumah erawh season hmasa lama a zia ang kha chhuah lehin an hmuhnawm hle a ni.

Leverkusen manager Alonso chuan, "Goal hnih kan khung hnuah keimahni lamah a lut ve leh a, kan tan chuah fiahna a ni chiang hle. Goal kan chhuah chiah khan chesual thei kan nihzia chu a takin kan hmu a, insiamṭhain kan khung belh ta zawk," a ti.

Season hmasa khan Leverkusen hian hneh loh nei loin Bundesliga nomawi an chawi a, an record duhawm ang kha chu tun season a tan chuan an nei thei dawn tawh lo, chutihrualin a tawp thlenga an beih ṭhin avangin Bayern Munich nen na takin nomawi an inchuh ngei a rinawm.