Real tana penalty khungtu Mbappe leh Vinicius

La Liga champion Real Madrid-in season bul ṭan fuh tawk lo mah se, league match hnih a zawnin an chak ve leh ta - Inrinni zan khan khualmualah Real Sociedad chu 2-0 in an hneh a, mahse, an goal hnih hi penalty aṭanga an khung ve ve a ni!

Real tana penalty chhuih luttute hi Vinicius Junior leh Kylian Mbappe te an ni a, Real ṭantute tan an player langsar pahnihin penalty inchuh loa an insem hi hmuh a nuam ang.

A goal ta

Real hian first half chhung zawngin goal an khung lo a, Carlo Ancelotti naute hian season bul an ṭan ṭhat tawk loh avangin an hlauthawng. Mahse, minute 58-naah Madrid khaw club tan vanneihna a her chhuak.

Manchester City left back hlui Sergio Gomez chuan Real rawlthar duhawm Arda Guler-a shot chu a kutin a tawk fuh a, penalty a chawi. Real tan Vinicius chuan penalty hmasa zawk hi goal-ah a chantir a, 1-0 a ni.

A hnu khartu

Real Madrid tan Kylian Mbappe chu a hnu khartuah a ṭang - minute 75-naah penalty an hlawh chhuak leh a, Mbappe chuan harsatna nei loin goal-ah a chantir a, a league match hmasa pathuma goal a khung loh hnuah goal thum a khung ve ta.

Paris Saint-Germain aṭanga Real pantu hi inchhuang thei erawh a awm bik lo - a goal khung pathum zinga pahnih hi penalty aṭanga a chhuih luh a ni a, insiamrem a la mamawh.

Sociedad vanduai

Real-in hnehna an chang a, nomawi humhim tur erawhin hmasawn an la ngai. Sociedad lakah pawh an vannei tih loh rual a ni lo - Luka Susic leh Sheraldo Becker ten first half-ah bar an tihper ve ve.

Second half-ah pawh Susic hian chance duhawm a nei leh a, mahse, post a tihper leh - Sociedad an vanduai a, Real-in point thum an hlawh chhuak.