Galatsaray tan Osimhen che ṭha nghal

Turkish Super Lig-ah Inrinni zan khan Nigerian striker Victor Osimhen-a'n Galatsaray tana a match hmasa ber a khel a, an khingpui Rizespor chu 5-0 in an sawp. Aslan tan Davinson Sanchez, Abdulkerim Bardakci, Gabriel Sara, Dries Mertens leh Baris Alper Yilmaz ten goal khat ṭheuh an khung.

Tun thla tir khan Galatasaray-in Napoli aṭangin Osimhen chu loan hmangin an lalut a, Serie A-a Napoli champion puitu striker hian ngaihven a hlawh hle. Nigerian striker hian a club thar tana a match hmasa berah goal khung nghal lo mah se assist a neih bakah a khel tluan.

Aslan hian match li an khelh tawhah hnehna an la chang vek a, Europe inelnaah erawh UCL playoff-ah Young Boys an hneh loh avangin Europa League an khelh a ṭul thung.