PSG khelh danah Enrique a lungawi

Paris Saint-Germain coach Luis Enrique chuan tun season bul an ṭan dan chu lawmawm a tih thu a sawi a, an match hnuhnung bera Brest an hneh ṭuma an naute rilru puthmang chuan a tilawm hle.

Inrinni zan khan Parc des Princes-ah mikhual Brest lamin Romain Del Castillo-a penalty hmangin goal an nei hmasa a, anmahni khelmualah ngei mai Paris club hi chesual thei dinhmunah an ding.

Mahse, chawlhlawk hmain Ousmane Dembele hmangin an sut a, inkhel chawhnu lamah France international hian a khung belh bakah Fabian Ruiz chuan goal khat dang a thawh ve leh bawk a ni.

PSG manager Enrique chuan, "Hnehna kan chan avangin ka lawm, kan chak mai bakah chak tura kan beih dan khan min tilawm bawk. Zawimuangin hma kan sawn zel tih chu a takin kan hmu nawn.

"Brest hi team ṭha tak, goal khung leh a venhim kawnga ṭha tak an ni. Penalty aṭangin an khung a, chumi hnuah huaisen takin kan bei let, khelmual sira fans lam pawhin min pui ṭha takzet," tiin a sawi.

Ligue 1 champion PSG hian tunah chuan Champions League lam an hawi leh tawh rih ang - Nilaini zan hian an group match hmasa ber atan Girona an mikhual ang.