Venezia sawptu AC Milan

AC Milan chuan an zia tak tak an chhuah ta - Inrinni zan Serie A inkhelah Milan hian Venezia chu 4-0 in an sawp a, an match lehpeka Inter Milan nen an inkhelh tur atan boruak an siam ṭha hle.

Milan hian minute hnihna lekah Theo Hernandez hmangin an khung ṭan a, chawlhlawk hmain Youssouf Fofana, Christian Pulisic leh Tammy Abraham ten goal khat ṭheuh khungin San Siro-ah nuamsa takin point thum an hlawh chhuak.

AC Milan manager Paulo Fonseca chuan, "Training-na lama kan zir angin kan khel chhuak thei ta, tuna kan chakna hian point thum bakah inrintawkna a siam chhuak ngei ang, chu chuan rah ṭha pawh a chhuah dawn a ni," tiin a sawi.

Tun season Serie A match vawi li an khelh ve tawhah Milan hi an chak vawi khatna a ni a, an match hmasa lamah an khingpui nen vawi hnih an inhnehtawk bakah ṭum khat chu an tlawm tawh, an tan Venezia hneh hi thil lawmawm tak a ni ngei ang.

Inkhel dangah Juventus erawhin Empoli lakah goal an khung thei lo a, an mikhualna ramah 0-0 in an inhnehtawk. Arsenal midfielder hlui Cesc Fabregas-a enkawl Como chu Bologna nen 1-1 in an inhnehtawk ve thung a ni.