Chelsea tan goal zawna vawi khat pet a tawk
Hun tawp hma minute thum chauh a awm tawh tihah Cesc Fabregas chuan QRP goal zawnah a pet a, a goal. Chelsea-in khualmualah 1-0 in hnehna an chang a, champion an hnaih sawt hle.
QPR khelmual Loftus Road-a inkhelah relegation zone aṭanga tal chhuah tum QPR an khel chhe lo a, vawi tam tak Chelsea tlarhnung an chhaih buai a, mah se Chelsea goalkeeper Thibaut Courtois an sutlang zo lo.
Chelsea erawhin goal zawnah vawi khat an pet fuh an chak pui thung. Chelsea hian Arsenal aia khelh khata khel tlem chungin point sarihin hma an hruai fal ta, champion tur chian lohna chu chhiarkawp dan chiah a ni ta.
Chelsea damna Fabregas
QPR goalkeeper Rob Green a chesual a, a ball pet chhuah sual chu Eden Hazard-a'n a lo la a, goal lamah tlan luh phei pui nghalin Oscar nen defender an chhaih buai karah Fabregas rawn tlan lut zawk a, ani hian yard 16 aṭangin chakna goal a khung.
Arsenal midfielder hlui hian tun season-ah Chelsea tan inelna hrang hrangah match 41 khel tawhin goal nga a khung tawh a, assists vawi 21 zet a nei tawh bawk.
Premier League bikah match 28 a khel tawh a, goal thum a khung tawh a, assists vawi 16 a nei tawh bawk. Arsenal chher chhuah, an lak kir leh tak loh hian Arsenal nomawi chawi tur a chhuhsak dawn niin a lang.
Innghahna tlak Courtois
Chelsea manager Jose Mourinho-a'n veteran goalkeeper Peter Cech aiah Courtois a ring zawk a, tihsual chang nei mah se tun dinhmun an thlen theihna chhan hi Belgian keeper vang a ni. Pathianni zan inkhelah khan Charlie Austin, leh Matt Phillips te goal khung ngei tur nia lang chu a dan sak a, a team-te point thum a hlawhchhuah pui a ni.
Manager-te thukhawchang
QPR manager Chris Ramsey chuan, "Kan chak lo hi a pawi ka ti hle. Tun hnaiah kan inkhel tawp lamah goal kan chhuah fo a, kan rilru kan pek tawk loh vang a ni. Chelsea lakah pawh khan goal khung theihna hun ṭhaw vawi thum vel lai chu kan nei, mahse kan khung thei tlat lo a, kan vanduai ve bawk a ni. Tuna kan awmna hi a duhawm lo rih hle a, mahse theih tawp chhuahin kan bei zel ang," tiin a sawi.
Chelsea manager Jose Mourinho chuan, "Derby a nih tawh chuan a boruak a dang ṭhin, ka tan chuan inkhel boruak sang hi a nuam zawk ṭhin a ni. tun season-ah hun tawp dawn a kan chak vawi hnihna a ni a, a hmain Everton lakah hun tawp dawnin kan lo chak tawh a, tunah kan chak leh bawk a kan vannei hle," tiin a sawi.
Inkhelh hmabak la awm thlirin Mourinho chuan, "Inelna ala tawp lo a, kan inkhelh hmabak neih hi a hautak vek tawh dawn a ni. Manchester United, Arsenal leh Liverpool kan tum tur chauh hi a harsa bik tur a ni tawh lo ang. Team dang zawng zawng pawhin point an mamawh nasat tawh em avangin a harsa vek tawh ang. Tin, QPR hian season tharah Premier League an khelh leh ngei ka duhsak a ni," tiin a sawi.