World number 1 hmasa ber Sania Mirza

Sania Mirza chu Indian tennis player zinga World number 1 ni thei hmasa ber a ni. Pathianni khan Family Circle Cup-ah Mirza leh Martina Hingis te ṭang dun chuan final-ah Casey Dellacqua leh Darija Jurak te ṭang dun chu 6-0, 6-4 a hnehin an champion a, WTA double world number 1-ah an inhlangkai a ni.

Kum 28-a upa Hyde­rabad nula hi Indian hmeichhe tennis player zingah chuan a thleng sang ber a la ni a, single inelnaah Grand Slam vawi kua lai a hmachhawn tawh. Australian Open-ah kum 2005 leh 2008 khan third round a thleng a, kum 2007 leh 2011 khan French Open-ah second round a lut bawk. Wimbledon-ah ṭum li inlan tawhin 2005, 2007, 2008 leh 2009 khan inlan mah se second round a la pel lo. Kum 2005 khan Grand Slam single-a a thlen san ber ṭum tawngin US Open-ah fourth round a invaw tling a ni.

Single-ah record chuanawm tak nei lo mah se, double-ah chuan record ṭha tak a nei thung a, WTA nomawi vawi 26 a chawi tawh bakah ITF nomawi vawi li a chawi tawh a ni. Grand Slam double-ah chuan kum 2012 khan Australian Open-ah semi-final an thleng a, kum 2011 khan French Open-ah final lut a; Wimbledon leh US Open-ah semifinal a thleng tawh bawk.

World number 1 thar Saina chuan, "Tunah chuan ka duhthusam a thleng dik ta. Kei leh ka chhungte bakah kan ram tan chanchinṭha a ni. He dinhmun thleng tur hian ka bei nasa a a tawpah chuan ka thleng thei ta, Hingis hi khelhpui a nuamin a fing em em a, ani zarah kan champion thei a, kan tum ram kan thleng thei a ni," tiin a sawi.