Texas-ah Marquez umphak an awm lo

Spanish World Champion Marc Marquez chu a kum zawna a vawi thum nan Pathianni khan Grand Prix of the America-ah tuma umphak lohin pakhatna a ni.

Kum 2015 MotoGP in­tlansiak hmasa ber Qatar-ah khan Marquez-a'n beisei a pha lo a, pangana-ah a thleng. Texas-ah erawh a thiam ala theihngilh lo a ni tih lantir nawn lehin a tlan ṭha leh hle. Pole position aṭanga bul ṭanin tuma el rual lohin a tlan tluan thei. Pahnihnaah Ducati rider Andrea Dovizioso chu a thleng a, an inthlauhna hi 2.3 seconds a ni.

Intlansiak hmasa bera che ṭha Yamaha rider Va­lentino Rossi chuan palina aṭangin intlansiak bul a ṭan a, hma sawn hretin pathumnaah a thleng a ni.

Rider ten eng nge an sawi?

Kum 22-a upa Marquez chuan, "Ka tan chuan ni hlimawm tak a ni e. Boruak awm dan leh intlansiak kawngte, ka bike leh kan team thawhho na zawng zawng te kha a fuh hle a ni. Qatar-ah khan tihsual ka neih avangin ka tlan ṭha tawk lo hle a, mahse tunah chuan ka tihsual te ka insiam ṭhain hma ka sawn leh tawh hle," tiin a sawi.

Ducati rider Dovizioso chuan, "Bike thunun a harsa a, kan tlankawng nena inmil tur tyre thlan thiam a harsa hle; a bik takin a ke hma tur thlan a awlsam lo. Hun harsa tak karah pahnihna ka ni thei hi ka lawm a, Rossi khan min lehpelhna hun ṭha hmu se chuan a bawhpelh lo ang. Ka dinhmun ka hum tlang thei kha ka lawm hle a ni," tiin a sawi.

Yamaha rider Rossi chuan, "Kan result-ah ka lungawi khawp mai, helai hmuna intlansiak hi kan team tan hian kum dangah pawh a lo harsa tawh ṭhin a mah se kuminah erawh kan tlan chhe lo e. Pathumna dinhmun luah theih hi a chhe hran lo," tiin pathumnaah a lungawi.

Season ṭan tirh aṭangin champion tur inum boruak a lian nghal a, kum dang angin pakhatna ni zawn nghal an awm loh bakah an point hmuh dan pawh a la inkhairual viau bawk.