Delhi Daredevils an chak thei lo

IPL-8 tana sum inseng nasa ber pawl Delhi Dare­devils in chak hmel an la hmu thei lo a, vawi hnih inkhelh tawhah an khingpuite an la hneh lo ve ve. Pathianni tlai khan Delhi Daredevils hian Rajasthan Royals chu wicket thumin an hneh lo a ni.

Feroz Shah Kotla, Delhi-a inkhelah hian Delhi bat hmasa zawkah an ṭang. Captain JP Duminy-a'n ball 38 a hmachhawnah run 44 a vawchhuak a, vaibelchhe 16 hlawhtu Yuvraj Singh chuan ball 17 a hmachhawnah run 27 vawchhuakin beisei a phak lo chhunzawm zel. Delhi hian over 20-ah run 184 vawchhuakin mi pathum an hloh a ni.

Rajasthan Royals hian vawi 11 an inkhelh tawhah Delhi an la hneh ngai lo a, Pathianni zanah erawh thawnthu a dang ta. Ball 25 a hmachhawnah kum 19-a upa Deepak Hooda chuan run 54 vawchhuakin a team a chhanhim. Over 20-ah Rajasthan in run 186 vawchhuak in mi pasarih an hloh a, wicket thumin hnehna an chang ta a ni.

Harbhajan a ropui

Pathianni zan inkhel dangah Kings XI Punjab chuan run 18 in Mumbai Indians an hneh bawk. Kings XI hian over 20-ah run 177 siamin mi panga an hloh a, Mumbai Indians in hei hi umin over 20-ah run 159 bak an tlin lo a, mi pasarih an hloh a ni.

India spin bowler Harbhajan Singh-a che ropui a, ball 24 a hmachhawnah run 64 a vawchhuak a, over 4 a vawmah run 20 chiah pe in wicket hnih a la bawk. A team Mumbai Indians erawh a chak pui zo ta chuang lo a ni.

Chennai Super Kings an Lal len

Inrinni tlai dar 4:00 khan CSK in an khelmual MA Chidambaram Stadium, Chennai-ah Sunrisers Hyderabad an lo mi­khual a, an dim lo hle. CSK hian over 20-ah mi pali chiah hloh in run 209 an vawchhuak a, Hyderabad lam hian over 20-ah run 164 bak tlin lo in mi paruk an hloh thung. CSk hian run 45 in hnehna an chang a ni.

Inrinni zan dar 8:00-ah Kolkata Knight Rides in an mikhual Royal Challengers Bangalore an ngam lo a, over 20-ah run 177 chiah vawchhuakin mi paruk an hloh. RCB in over 19-ah an target hi mi pasarih hloh chungin an umph a, run 179 vawchhuakin wicket thumin Eden Gardens, Kolkata-ah hnehna an chang ta a ni.

Inkhel dang

Nizan dar 8:00-ah khan Royal Challengers Bangalore in an khelmual M.Chinnaswamy Stadium, Bangalore-ah Sunrisers Hyderabad an mikhual a, an result kan hre hman lo.

Zanin dar 8:00-ah Rajasthan Royals leh Mumbai Indians te Sardar Patel Stadium, Ahmedabad-ah an inkhel bawk ang.