Serie A boruak a nung THAR

Juventus in point 12 zetin hma an hruai fal tawh a, champion turin an dinhmun a ṭha tawh. Hetih mek lai hian kum thara Champions League khelh tuma inum boruak pawh a nung ṭha hle.

Kartawp Serie A inkhelah Lazio chuan an khingpui Empoli chu 4-0 in an sawp a, table-ah Roma lehpelin pahnihnaah an in hlangkai. Roma-in point thum an hlawhchhuak zo lo a, an khingpui Torino nen goal khat ve ve khungin ann inhnehtawk a, point hnih an hloh.

Lazio tan hian Stefano Mauri, Miroslav Klose, Antonio Candreva leh Felipe Anderson te'n goal khat ṭheuh an khung. He inkhelah hian Lazio defender Diego Novaretti chu yellow card vawihnih a hmuh vangin hnawhchhuah a ni.

Lazio coach Stefano Pioli chuan, "Tuna kan awmnaah hian ka lawm a, kan lungawi tlang rilh hle a ni. Mahse inelna a la tawp lo tih erawh kan hriat nawn ka duh. Tunlai ka naute khelh danah ka lawm a, kan khelh hmabakah hian point 24 zet hmuh theih ala nih avangin kan inthlahdah thiang lo," tiin a sawi.

Beisei nei Napoli

Rafael Benitez a nau ten an beiseina an la chhem nung ve zel a, Coppa Italia Semi-final aṭanga an tlak hnu a an match hmasa berah Fiorentina chu 3-0 in an hneh.

Argentina striker Gonzalo Higuain a goal thun ni ngei a lang chu goal line a pel lo a ngaih a nih avangin goal a pawm a ni lo. Mahse, Napoli tan Dries Mertens, Marek Hamsik leh Jose Callejon ten goal khat ṭheih an khung a ni. Inkhelh zawhah Higuain chuan a ball pet chu a goal ngei thu leh goal-a an pawm­sak lo chu mak a tih thu a sawi a ni.

Italy-ah hian goal-line techno­logy hman ala ni lo a, mahse Italian Cup final-ah chuan hman tum a ni tawh bakah kum thar aṭang chuan Serie A-ah pawh hman tawh tur a ruahman a ni bawk.

Inkhel dangah AC MIlan-in hma an sawn mawh hle a, an khelmual San Siro-ah Sampdoria nen goal khat ve ve khungin an inhnehtawk a ni.